ZAQATALADA YENİ KÖRPÜ İSTİFADƏYƏ VERİLMİŞDİR
AZƏRTAC xəbər verir ki, 15 iyun - Milli Qurtuluş günündə Zaqatala rayonunun Zilban kənd sakinləri gözəl bayram hədiyyəsi almışlar. Car ilə Zilban kəndlərini birləşdirən çayın üzərində yeni körpünün inşası sakinləri uzun illərdən bəri narahat edən ən ciddi problemlərdən idi. Artıq bu problem öz həllini tapmışdır.
Körpünün istifadəyə verilməsi münasibətilə keçirilən tədbirdə Zaqatala Rayon İcra Hakimiyyətinin başçısı Asif Əsgərov problemin qısa müddətdə həll olunmasının dövlətin vətəndaşlara göstərdiyi diqqət və qayğının daha bir bariz nümunəsi olduğunu bildirmiş, bu istiqamətdə tədbirlərin bundan sonra da davam etdiriləcəyini söyləmişdir.
Kənd sakinləri göstərilən diqqət və qayğıya görə dövlətimizin başçısına, eləcə də rayon rəhbərliyinə minnətdarlıqlarını bildirmişlər.
Rəmzi qırmızı lent kəsildikdən sonra ictimaiyyət nümayəndələri və ilk maşın karvanı körpünün üzərindən keçmişdir.
Daxili imkanlar hesabına inşa edilən yeni körpünün istifadəyə verilməsi 550 nəfər əhalisi olan Zilban kəndinin Car kəndi ilə, eləcə də rayon mərkəzi ilə əlaqəsini xeyli yaxşılaşdıracaqdır.
Bölmənin digər xəbərləri
