2012-Cİ İLDƏ DÜNYA ƏHALİSİNİN SAYI 7 MİLYARDA ÇATACAQDIR
AZƏRTAC-ın xüsusi müxbiri Assoşieyted Press agentliyinə istinadla xəbər verir ki, planetimizin qarşılaşdığı ərzaq təhlükəsizliyinə, geniş yayılmaqda olan xəstəliklərə və təbii fəlakətlərə baxmayaraq, 2012-ci ildə dünya əhalisinin sayı 7 milyard nəfərə çatacaqdır.
Hazırda dünyada 6,7 milyard adam yaşayır. Əhalinin sayına görə Çin və Hindistan yenə də siyahının önündə gedirlər. 304 milyonluq sakini ilə Amerika Birləşmiş Ştatları üçüncü yeri tutur.
1999-cu ildə əhalinin sayı 6 milyardı ötmüşdür. Demoqrafik artım daha çox inkişaf etməkdə olan ölkələrdə müşahidə olunmaqdadır. Hər il əhali arasında 1,2 faiz artım qeydə alınır. Avropa ölkələrində doğumun səviyyəsində azalma prosesi müşahidə edildiyi halda, Afrikanın Mali və Nigeriya kimi dövlətlərində hər bir qadın 6-dan çox uşaq dünyaya gətirir.
Doğumla bağlı bəzi məhdudlaşdırıcı tədbirlərə, qanunlara baxmayaraq, əhalinin artımına görə Asiya qitəsi yenə də lider olaraq qalmaqdadır.
