Bakı, 22 noyabr (AZƏRTAC). Noyabrın 22-də Milli Məclisin növbəti iclasında 2014-cü il dövlət büdcəsi təsdiqlənmişdir.

AZƏRTAC xəbər verir ki, Milli Məclisin sədri Oqtay Əsədov bildirmişdir ki, “Azərbaycan Respublikasının 2014-cü il dövlət büdcəsi haqqında” qanun layihəsinin parlamentdə müzakirəsi zamanı deputatların əksəriyyəti çıxış etmiş, rəy və təkliflər səsləndirmişlər. Hökumət deputatların qaldırdıqları məsələləri bir daha müzakirə etmiş və gələn ilin əsas maliyyə sənədinə bəzi dəyişikliklər olunmuşdur.

Milli Məclisin iclasında büdcə zərfinə daxil olan digər qanun layihələri də qəbul olunmuşdur. 2014-cü ildə Azərbaycanın dövlət büdcəsinin gəlirləri 18 milyard 384 milyon manat, xərcləri isə 20 milyard 63 milyon manat proqnozlaşdırılmaqla təsdiqlənmişdir.

Maliyyə naziri Samir Şərifov demişdir ki, hökumət Milli Məclisdə büdcə zərfinin müzakirəsi zamanı deputatların əhalinin maddi rifahının daha da yaxşılaşdırılması, ölkənin müdafiə potensialının gücləndirilməsi, qeyri-neft sahələrinin inkişafı, vergi borclarının azaldılması, vergidən yayınmanın qarşısının alınması, elm, təhsil, səhiyyə, mədəniyyət sahələri üçün əlavə büdcə vəsaitlərinin cəlb edilməsi, sənaye və aqrar sektora dövlət dəstəyinin artırılması, regionların iqtisadi inkişafı, bələdiyyələrin fəaliyyətinin genişləndirilməsi istiqamətində əlavə tədbirlərin görülməsi ilə bağlı verdikləri təklif və tövsiyələri təhlil etmişdir. Həmin təkliflərin bəziləri növbəti ilin əsas maliyyə sənədində büdcə xərclərinin artırılması yolu ilə deyil, xərclərin strukturunda dəyişikliklər olunmaqla əksini tapmışdır. Digər təkliflərlə bağlı isə mərhələli şəkildə növbəti illərin dövlət və icmal büdcələrinə baxılarkən tədbirlər görüləcəkdir. Nazir ümumiyyətlə hər bir təklifin və layihənin nəzərə alınması zamanı büdcə dayanıqlığının təminatının və makroiqtisadi sabitliyin qorunması məsələsinin əsas götürülməsinin vacibliyini önə çəkmişdir.

Samir Şərifov bildirmişdir ki, 2014-cü ilin dövlət büdcəsi balanslaşdırılmış büdcədir və Prezident İlham Əliyevin rəhbərliyi ilə həyata keçirilən uğurlu siyasəti növbəti ildə də həyata keçirmək üçün zəmin yaradacaqdır.

Sonra Dövlət Sosial Müdafiə Fondunun 2014-cü il üçün büdcəsi gəlirləri və xərcləri 2 milyard 928,5 milyon manat olmaqla təsdiqlənmişdir. İclasda 2014-cü il dövlət büdcəsi və Dövlət Sosial Müdafiə Fondunun büdcəsi ilə yanaşı, növbəti il üçün yaşayış minimumu və ehtiyac meyarının həddi haqqında qanun layihələri, Milli Məclisin və Hesablama Palatasının 2014-cü il üçün xərclər smetaları da təsdiqlənmişdir. 2014-cü ildə yaşayış minimumu ölkə üzrə 125 manat, ünvanlı dövlət sosial yardımın təyin edilməsi məqsədi ilə ehtiyac meyarı 100 manat məbləğində nəzərdə tutulur. Bununla da Milli Məclis növbəti ilin əsas maliyyə sənədlərini təsdiqləmişdir.

Sonra Milli Məclis Azərbaycan Prezidentinin Sərəncamı ilə kənd təsərrüfatı naziri təyin olunan Heydər Əsədovun Hesablama Palatasının sədri vəzifəsindən azad edilməsi, Vüqar Gülməmmədovun Palatanın yeni sədri təyin edilməsi məsələsinə baxaraq müsbət münasibət bildirmişdir.

Milli Məclisin iqtisadi siyasət komitəsinin sədri Ziyad Səmədzadə demişdir ki, büdcə resurslarından istifadə zamanı şəffaflığın təmin olunmasında ölkənin ali maliyyə nəzarəti orqanı olan Hesablama Palatasının rolu böyükdür. İldən-ilə fəaliyyəti daha da təkmilləşən palatada kifayət qədər peşəkar kadr çalışır. Palata həm büdcənin icrası, həm də növbəti illərin büdcə proqnozları ilə bağlı vaxtında, dolğun və aydın rəy hazırlayaraq Milli Məclisə təqdim edir.

Daha sonra “İctimai iştirakçılıq haqqında” yeni qanun layihəsi qəbul olunmuş, “Sərhəddən keçən su axınlarının və beynəlxalq göllərin mühafizəsi və istifadəsi üzrə Konvensiya”ya düzəlişlər təsdiqlənmişdir. “Azərbaycan Respublikası milli təhlükəsizlik orqanlarının 95 illiyi (1919-2014)” Azərbaycan Respublikasının yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Qanunda, eləcə də Mülki, İnzibati Xətalar, Vergi məcəllələrində, “Hüquqi şəxslərin dövlət qeydiyyatı və dövlət reyestri haqqında”, “Patent haqqında”, “Əmtəə nişanları və coğrafi göstəricilər haqqında”, “Daşınmaz əmlakın dövlət reyestri haqqında”, “Dövlət rüsumu haqqında”, “Sosial sığorta haqqında”, “Kənd təsərrüfatı məhsulları istehsalçılarına müddətli vergi güzəştlərinin verilməsi haqqında” qanunlarda, “Bələdiyyələrin əraziləri və torpaqları haqqında” Azərbaycan Respublikasının Qanununa əlavə edilmiş “Azərbaycan Respublikasında bələdiyyələrin siyahısı”nda dəyişikliklər edilmişdir.

“İctimai iştirakçılıq haqqında” qanun layihəsini təqdim edən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, deputat Azay Quliyev bildirmişdir ki, məqsəd Azərbaycan vətəndaşlarının dövlətin idarə olunmasında iştirak etmək hüququnun ictimai iştirakçılıq formasında gerçəkləşdirilməsi üçün təminatlar yaratmaqdır.

Bildirilmişdir ki, “Kənd təsərrüfatı məhsulları istehsalçılarına müddətli vergi güzəştlərinin verilməsi haqqında” Qanunda edilən dəyişikliklə kənd təsərrüfatı məhsulları istehsalçılarına verilən müddətli vergi güzəştlərinin müddəti artırılmışdır. Belə ki, kənd təsərrüfatı məhsullarının istehsalçıları 2014-cü il yanvarın 1-dən başlayaraq daha 5 il müddətinə Vergi Məcəlləsi ilə müəyyən edilən mənfəət və əlavə dəyər vergilərini, sadələşdirilmiş sistem üzrə vergini və həmin fəaliyyət prosesində istifadə olunan obyektlərdən əmlak vergisini ödəməkdən azad olunacaqlar.

Milli Məclisin aqrar siyasət komitəsinin sədri Eldar İbrahimov demişdir ki, kənd təsərrüfatı məhsulları istehsalçılarına müddətli vergi güzəştlərinin tətbiqi 2001-ci ildən başlamışdır və ötən 13 ildə davam edən bu siyasət indiyədək 1,4 milyard manat vəsaitin fermerlərdə qalmasına və həmin vəsaitin istehsalın inkişafına yönəldilməsinə imkan vermişdir. Nəticədə istehsalın həcmi 4,4 dəfə artmışdır.

İclasda Xaçmaz rayonunun Xaraxoba kəndinin Palıdlı kəndi adlandırılması haqqında da qanun layihəsi qəbul olunmuşdur.