27 Sentyabr - 30 ilin həsrət alovunun 44 gün məcrasında bitməsi
Bakı, 27 sentyabr, AZƏRTAC
Böyük Zəfəri bizə qazandıran 44 günlük müharibənin başlandığı nöqtədir 27 Sentyabr. Azad olunan Qarabağ, fəth olunan Şuşa, işğalçıdan təmizlənən Vətən torpağı. Xəyallarımızın gerçəkləşdiyi möhtəşəm 2020-ci il! Bəli, qismətimizdə bunu da yaşamaq varmış. Bizə “yuxu” kimi görünən Zəfər müjdəmizin bəlkə də ən ağlasığmaz tərəfi budur: 30 ilin həsrət alovunun 44 gün məcrasında bitməsi. Amma nəzərə alanda ki, bura gətirən yolun məfkurə mücadilələri, ideoloji savaşları zaman-zaman Ali Baş Komandan İlham Əliyevin dövləti təfəkkür, siyasi səriştə və intellekt miqyasının gücü sayəsində daim diri qalmışdı, fəhm etmək o qədər də çətin olmaz. 27 Sentyabr başlanğıc üçün bir an idi. Tarixdə o anın gəlişini gerçəkləşdirən əməllər sırası var və yüz illər keçsə də, tarix hər zaman bizimlə bu gerçəklərin üslubunda danışacaq.
Bu fikirləri AZƏRTAC-a açıqlamasında Milli Məclisin deputatı, filologiya elmləri doktoru Elnarə Akimova söyləyib. O bildirib ki, 44 günlük savaş bütün mənalarda Vətən müharibəsi oldu: “Millət kükrəyən emosiyası, əsgərlər fədai ruhu, Ali Baş Komandan səriştə və diplomatik əzmi ilə meydanda idi. Ölkədəki siyasi partiyalar da bu ali məram ətrafında ilk dəfə idi ki, birləşmişdi. Bəli, 44 günlük müharibə də bizim üçün ayrılıqda hansısa partiyanın deyil, onların birgəliyinin gücündən hasilə gələn Azərbaycan dövrüdür. Bu birlik yalnız ölkə daxilində deyildi. Bütün Türk dünyası bu savaşda yanımızda idi. Bu Qələbə türk milli şüurunun Qələbəsi idi.
Bu 44 gündə Azərbaycan öz bütövlüyünü qanı ilə qazanmağa layiq orduya, milli miqyasda düşüncə və təşkilati iş vüsətinə sahib olduğunu dünyanın göz önünə sərdi. Müstəqillik mentaliteti və statusunu hər zaman qoruyan Ali Baş Komandan İlham Əliyevin dünyanın gözü qarşısında nümayiş etdirdiyi məğrur Lider obrazı isə onun məqsəd və mövqeyinə real-əməli mündəricə qazandıran əsas rəmzlərdən oldu”.
Prezident İlham Əliyevin Ermənistanın təxribatına qarşı hər zaman ayıq, dəqiq və qətiyyətli ideoloji mövqe sərgilədiyini vurğulayan alim deyib: “Tarixdəki bir ibrətamiz faktı xatırlatmaq istəyirəm. Məlumdur ki, ermənilər öz mənfur niyyətlərini zamanla gerçəkləşdirmək üçün onlara buraxılmış İrəvan ərazisində təşkilatlanıb böyük düşmənə çevrildi və üstündən bir əsr keçəndən sonra Azərbaycan Respublikasının Prezidenti İlham Əliyev bu acı gerçəklərin siyasi təsnifatını tarixdə ilk dəfə 2011-ci ildə Dünya Azərbaycanlılarının III qurultayında verdi. Prezident BMT Baş Assambleyasının 76-cı sessiyasındakı çıxışı zamanı da çox mühüm məqamlara toxundu. Ermənilərə məxsus ənənəvi dini və irqi ambisiyanın konkret tarixi səbəblərinə diqqət yönəldən ölkə rəhbəri dünya ictimaiyyətinə bu dövlətin nə qədər cinayətkar olduğunu çatdırdı. Beynəlxalq hüququn bütün normalarını, BMT Nizamnaməsində qeyd edilmiş İnsan Haqlarını, Cenevrə Konvensiyasının bütün qərarlarını pozan Ermənistan dövlətinin daxili mahiyyətini bütün tərəfləri ilə meydana qoydu. Dövlətimizin başçısı dünyanın gözü qarşısında konsepsiya səviyyəsində ifadəsini tapmış diplomatik səriştənin gücünü sərgiləyir və bu güc qarşısında erməni mifi və onların bədnam Nemesis, Andranik, Şaan Natali kimi qum heykəlləri ovulub tökülür...”
44 günlük Vətən savaşının ölkəmizin tarixi-siyasi, ədəbi-mədəni və mənəvi həyatında yeni bir mərhələnin başlanğıcı olduğunu vurğulayan E.Akimova fikrini belə yekunlaşdırıb: “Bu başlanğıc nöqtəsindən yeni bir Azərbaycanın və onun yeni tarixinin, ədəbiyyatının, mədəniyyət və incəsənətin ərsəyə gələcəyi şübhəsizdir”.
Bölmənin digər xəbərləri
