Naxçıvan Dövlət Kukla Teatrında “Yeddi şəhid, bir şahid” tamaşasının premyerası olub
Naxçıvan, 11 oktyabr, AZƏRTAC
Oktyabrın 11-də M.T.Sidqi adına Naxçıvan Dövlət Kukla Teatrında “Yeddi şəhid, bir şahid” tamaşasının premyerası keçirilib.
Teatrdan AZƏRTAC-ın bölgə müxbirinə bildirilib ki, tədbirdə şəhid ailələrinin üzvləri və teatrsevərlər iştirak ediblər. Teatrın direktoru Səyyad Məmmədov çıxış edərək səhnə əsərinin tarixi hadisələrin və şəhidlərin qəhrəmanlığının təbliği baxımından əhəmiyyətini vurğulayıb. O, bu cür tamaşaların gənc nəslin vətənpərvərlik ruhunda tərbiyəsində, milli yaddaşın qorunmasında və şəhidlərin əziz xatirəsinin yaşadılmasında mühüm rol oynadığını bildirib.
Qeyd edək ki, tamaşa "Milli Mədəniyyətin Təbliği" İctimai Birliyinin rəhbəri Jalə Cəfərovanın danışdıqları real hadisələr əsasında səhnələşdirilib. Jalə Cəfərova premyerada iştirakından qürur duyduğunu bildirərək tamaşanın ərsəyə gəlməsində əsas məqsədin şəhidlərin igidliyini, fədakarlığını və döyüş yolunu gələcək nəsillərə çatdırmaq olduğunu vurğulayıb. O, səhnə əsərinin milli yaddaşın qorunmasına töhfə verəcəyinə inamını ifadə edib və tamaşanın hazırlanmasında əməyi olan hər kəsə təşəkkürünü bildirib.
Sonra şəhid ailələrinin nümayəndəsi Elza xanım çıxışında qəhrəmanların döyüş yolunun gələcək nəsillərə çatdırılmasının vacibliyini qeyd edib.
1997-ci ilin aprelində baş vermiş hadisələri əks etdirən tamaşanın süjet xəttində "N" saylı hərbi hissənin səkkiz nəfərdən ibarət kəşfiyyat qrupunun taleyi dayanır. Xocavənd istiqamətində mühüm hərbi tapşırığı yerinə yetirdikdən sonra geri qayıdan qrup düşmən mühasirəsinə düşür. Səhnə əsərində kəşfiyyatçıların mühasirə zamanı üzləşdikləri çətinliklər, yaşadıqları gərgin anlar və göstərdikləri qəhrəmanlıq dramatik səhnələrlə təqdim olunur.
Tamaşanın quruluşçu rejissoru Səyyad Məmmədov, rejissor assistenti Mənsurə Hümbətova, musiqi tərtibatçısı Əli Məmmədov, quruluşçu rəssam isə Ruqiyyə Rüstəmovadır. Leytenant Elxan Ağayevi - İlqar Babayev, leytenant Vüqar Yarəhmədovu - Sənan Abutalıbov, çavuş Dinar Mustafayevi - Fikrət Qənbərli, çavuş Nizami Ələkbərovu - Nurlan Qafarzadə, çavuş Aqşin Həsənovu - Sadiq Əliyev, çavuş Aqil Əhmədovu - Nurlan Sultanlı, düşməni - İlham Babayev və İbad Nəbiyev canlandırıblar.
Aktyorların təsirli ifası tamaşaçılara hadisələrin dramatizmini və kəşfiyyatçıların mübarizə əzmini çatdırıb.
Sonda "Milli Mədəniyyətin Təbliği" İctimai Birliyinin rəhbəri Jalə Cəfərova tərəfindən aktyorlara təşəkkürnamələr və plaketlər təqdim olunub.
Müxbir - Nail Əsgərov
Bölmənin digər xəbərləri
