Fransada inflyasiya 2024-cü ilin yanvarından bəri ən yüksək göstəriciyə çatıb
Paris, 2 noyabr, AZƏRTAC
Fransada inflyasiya oktyabr ayında illik ifadədə 3,4 faizə çataraq 2024-cü ilin yanvarından bəri ən yüksək səviyyəyə çatıb. Sentyabrda 3,1 faiz, avqustda isə 2,4 faiz olan inflyasiyanın artmasına əsasən enerji daşıyıcılarının və bəzi ərzaq məhsullarının bahalaşması təsir göstərib.
AZƏRTAC xəbər verir ki, bu barədə Fransa Milli Statistika və İqtisadi Tədqiqatlar İnstitutunun (INSEE) dərc etdiyi ilkin qiymətləndirmədə bildirilir.
İnstitutun məlumatına görə, əsasən qaz və neft məhsullarının qiymətləri oktyabrda illik müqayisədə 24,1 faiz artıb. Sentyabrda bu göstərici 21,3 faiz təşkil edib. Beləliklə, enerji qiymətlərində artım ardıcıl dördüncü aydır sürətlənir.
Xidmət sektorunda da bahalaşma qeydə alınıb: oktyabrda qiymətlər 2,7 faiz artıb, sentyabrda isə bu göstərici 2,4 faiz olub. Xüsusilə yaşayış və nəqliyyat xidmətləri bahalaşıb. Ərzaq məhsullarının qiymət artımı isə bir qədər zəifləyərək sentyabrdakı 1,4 faizdən oktyabrda 1,2 faizə düşüb. Təzə ərzaq məhsullarında artım 9,5 faizdən 8 faizə enib.
Emal olunmuş sənaye məhsullarının qiymətləri azalmağa davam edib, lakin bu prosesin tempi zəifləyib: oktyabrda 0,2 faiz, sentyabrda isə 0,3 faiz ucuzlaşma qeydə alınıb.
Aylıq müqayisədə istehlak qiymətləri sentyabrda 0,3 faiz azaldıqdan sonra oktyabrda 0,4 faiz artıb. Bu yüksəlişə də əsasən enerji qiymətləri təsir göstərib.
Avropa İttifaqı ölkələri arasında müqayisə aparmağa imkan verən uyğunlaşdırılmış istehlak qiymətləri indeksi (IPCH) isə oktyabrda illik ifadədə 3,8 faiz artıb. Sentyabrda bu göstərici 3,4 faiz olub. Aylıq müqayisədə indeks 0,4 faiz yüksəlib; əvvəlki ay isə 0,3 faiz azalmışdı.
Bölmənin digər xəbərləri
