Avropada dərinləşən sosial-siyasi problemlər hökumətlərin idarəetmə qabiliyyətini sual altına qoyur – ŞƏRH
Bakı, 2 noyabr, AZƏRTAC
Avropanın bir sıra ölkələrində son dövrlər sosial-iqtisadi problemlərin dərinləşməsi, ictimai narazılıqların artması və küçə qarşıdurmalarının intensivləşməsi mövcud siyasi idarəetmə modelinin effektivliyi ilə bağlı ciddi suallar doğurur. Xüsusilə Almaniya və Fransada müşahidə olunan ictimai gərginlik, miqrasiya məsələsi, enerji təhlükəsizliyi, bahalaşma və sosial təminat problemləri Avropa hökumətlərinin qarşısında duran əsas çağırışlardandır.
Bu barədə AZƏRTAC-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib.
Onun sözlərinə görə, Avropa ölkələrində müşahidə olunan proseslərə yalnız ayrı-ayrı sosial etirazlar və ya təhlükəsizlik problemi kimi yanaşmaq düzgün olmazdı.
“Burada daha geniş siyasi və iqtisadi səbəblər, o cümlədən əhalinin həyat səviyyəsi, sosial müdafiə, məşğulluq, miqrasiya siyasəti və dövlət idarəçiliyinə inam məsələləri dayanır. Almaniyada baş verən hadisələr fonunda Avropa hökumətlərinin sosial narazılıqları əsasən təhlükəsizlik tədbirləri və siyasi bəyanatlarla aradan qaldırmağa çalışması problemin köklü həlli üçün kifayət etmir. Çünki insanların gündəlik həyatında üzləşdiyi çətinliklər aradan qaldırılmadıqca ictimai narazılıqların yenidən baş qaldırması və daha geniş miqyas alması riski qalır. Avropa ölkələrində enerji qiymətlərinin yüksəkliyi, yaşayış xərclərinin artması, mənzil təminatı, işsizlik və sosial bərabərsizlik məsələləri də vətəndaşların narazılığını gücləndirən amillərdəndir. Eyni zamanda, miqrasiya siyasətinin yaratdığı çətinliklər, miqrantların cəmiyyətə inteqrasiyası və ictimai təhlükəsizliklə bağlı müzakirələr bir sıra ölkələrdə siyasi gündəmin əsas mövzularına çevrilib”, - deyə A.Nağıyev vurğulayıb.
Komitə sədri qeyd edib ki, Avropada siyasi hakimiyyətlərin qarşısında duran əsas vəzifə cəmiyyətə yeni vədlər vermək deyil, mövcud problemlərin həlli istiqamətində konkret və nəticəyönümlü addımlar atmaqdır: “Əks halda, ənənəvi siyasi qüvvələrə inamın azalması, radikal və populist siyasi cərəyanların mövqelərinin güclənməsi ehtimalı artır. Avropa uzun illər demokratiya, insan hüquqları, qanunun aliliyi və sosial rifah prinsiplərini beynəlxalq münasibətlərdə əsas dəyərlər kimi təqdim edib. Lakin bu gün həmin dəyərlərin qorunması ilə bağlı problemlərin Avropanın öz daxilində də aktuallaşması diqqət çəkir”.
Deputat əlavə edib ki, Almaniya və Fransada küçə qarşıdurmaları, miqrasiya böhranı, enerji təhlükəsizliyi ilə bağlı çətinliklər və sosial narazılıqlar Avropa institutlarının böhranlara nə dərəcədə hazırlıqlı olduğunu da gündəmə gətirir. Bu baxımdan, Avropanın beynəlxalq müstəvidə demokratik dəyərlərin müdafiəçisi kimi çıxış etməsi ilə yanaşı, həmin prinsipləri öz cəmiyyətlərində də təmin etməsi vacibdir.
“Avropanın gələcək siyasi və iqtisadi sabitliyi hökumətlərin mövcud problemlərə nə dərəcədə real və effektiv həll yolları təqdim etməsindən asılı olacaq. Sosial narazılıqların səbəbləri aradan qaldırılmadan yalnız inzibati və təhlükəsizlik tədbirləri ilə sabitliyin təmin edilməsi uzunmüddətli nəticə verməyəcək”, - deyə komitə sədri bildirib.
Bölmənin digər xəbərləri
