Ağdamda müasir təhsil infrastrukturunun yeni siması - Xıdırlı kənd tam orta məktəbindən REPORTAJ FOTO VİDEO
Ağdam, 19 yanvar, Tahir Ağaməmmədov, AZƏRTAC
İşğaldan azad olunmuş ərazilərdə aparılan bərpa və yenidənqurma işləri çərçivəsində təhsil infrastrukturunun yenilənməsi prioritet istiqamətlərdəndir. Bu istiqamətdə həyata keçirilən layihələrdən biri də ötən il istifadəyə verilən Ağdam rayonunun Xıdırlı kənd tam orta məktəbidir.
AZƏRTAC-ın bölgə müxbiri xəbər verir ki, müasir tələblərə cavab verən məktəb binası həm infrastrukturu, həm də burada yaradılan tədris mühiti ilə seçilir. Xıdırlı kənd tam orta məktəbi bu gün doğma yurda qayıdan müəllim və şagirdlər üçün gələcəyə inamın və yeni başlanğıcın simvoluna çevrilib.
Məktəbin direktoru Mətanət Məmmədova üçün bu təhsil ocağı yalnız iş yeri deyil, həm də yarımçıq qalan arzularının davamıdır. Bildirir ki, Xıdırlı kəndində anadan olub və orta təhsilini də bu məktəbdə alıb. Bakı Dövlət Universitetinin mexanika-riyaziyyat fakültəsini bitirdikdən sonra doğma məktəbinə müəllim kimi qayıdan Mətanət Məmmədova təəssüflə qeyd edir ki, fəaliyyəti cəmi üç il çəkib və Xıdırlı kəndinin işğalı səbəbindən 26 yaşında doğma yurdunu tərk etməli olub.
“Sonrakı illərdə təhsil sahəsində çalışsam da, içimdə bir boşluq var idi. Bu boşluğun 2025-ci il sentyabrın 15-də tamamlandığını hiss etdim. Xıdırlı kənd tam orta məktəbi fəaliyyətə başladı və mən bu məktəbə direktor təyin olundum. Artıq yarımçıq qoyduğum arzularımı reallaşdırıram”, – deyə məktəb direktoru vurğulayır.
Direktorun sözlərinə görə, 528 şagird yerlik məktəb binası yüksək infrastruktura malikdir. İkimərtəbəli binada 21 sinif otağı, 2 kompüter otağı, 3 laboratoriya, 3 fənn kabineti, hərbi hazırlıq otağı və məktəbə hazırlıq qrupları fəaliyyət göstərir. “Dövlətimiz bizə tam təchiz olunmuş müasir məktəb verib. Əsas məqsədimiz burada gələcəyin həkimlərini, mühəndislərini, alimlərini və ən əsası, Vətəninə bağlı şəxsiyyətlər yetişdirməkdir”, – deyə o əlavə edir.
Xıdırlı kənd tam orta məktəbində çalışan müəllimlər də işğaldan azad olunmuş torpaqlarda fəaliyyət göstərməyin qürurunu yaşayırlar. Riyaziyyat müəllimi İlahə Qarayeva bildirir ki, 2025-ci ilin sentyabrından etibarən bu məktəbdə dərs deyir. Onun sözlərinə görə, valideynləri ona Xıdırlı kəndi haqqında çox danışıblar: “Həmişə arzulayırdım ki, burada yaşayım. Bu gün Xıdırlı kəndində yaşayıram və şagirdlərə riyaziyyat fənnini tədris edirəm. Dədə-baba yurdumda müəllim kimi çalışmaq çox qürurverici hissdir. Həm müəllimlərin, həm də şagirdlərin əhvali-ruhiyyəsi yüksəkdir”.
Şagirdlər də yeni məktəbdən və kənddəki şəraitdən razıdırlar. 8-ci sinif şagirdi Abdulla Qurbanov deyir ki, Xıdırlıya gəldikdən sonra buranın gözəlliyi onu heyran edib: “Bura gəldiyim üçün çox sevinirəm. Valideynlərim Xıdırlı kəndi haqqında danışsalar da, təsəvvür edə bilmirdim. Kəndə gələndən sonra buranın gözəlliyini gördüm. Məktəbimiz də çox gözəldir, müəllimlərimiz dərsləri bizə yaxşı tədris edirlər”.
Qeyd edək ki, Ayköl Manas adına Xıdırlı kənd tam orta məktəbinin açılışı ötən il iyulun 3-də Azərbaycan Respublikasının Prezidenti İlham Əliyev və Qırğızıstan Respublikasının Prezidenti Sadır Japarovun iştirakı ilə baş tutub. Beş blokdan, o cümlədən idman zalı blokundan ibarət məktəb binası 2,7 hektar ərazini əhatə edir. Burada sinif otaqları, laboratoriyalar və fənn kabinetləri ilə yanaşı kitabxana, idman və akt zalları, yeməkxana yaradılıb. Məktəbin ərazisində həm şagirdlərə, həm də əhaliyə xidmət göstərəcək qaçış zolağı olan idman meydançası, oyun və istirahət sahələri də inşa edilib.
Müasir maddi-texniki bazaya malik Xıdırlı kənd tam orta məktəbi işğaldan azad olunmuş ərazilərdə təhsilin bərpasının, həyata qayıdışın və gələcəyə inamın bariz nümunəsidir.
Bölmənin digər xəbərləri
