İstanbul, 18 dekabr, AZƏRTAC

Dekabrın 18-də İstanbulda Azərbaycan Xalq Cümhuriyyətinin Daxili İşlər naziri işləmiş Behbud xan Cavanşirin xatirəsinə ucaldılan abidənin açılışı olub.

AZƏRTAC xəbər verir ki, Azərbaycanın İstanbuldakı baş konsulluğunun təşkilatçılığı, İstanbul Valiliyi və İstanbul Böyükşəhər Bələdiyyəsinin dəstəyi ilə hazırlanan xatirə abidəsi şəhərin tarixi bölgələrindən olan Beyoğlu rayonunda, Behbud xan Cavanşirin erməni terrorçu tərəfindən qətlə yetirildiyi “Pera Palas” otelinin qarşısında yerləşdirilib.

Açılış mərasimində Beyoğlu Bələdiyyəsinin və konsulluğun əməkdaşları, diplomatlar, rəsmi şəxslər, ziyalılar, Türkiyədə fəaliyyət göstərən Azərbaycanın dövlət təşkilatlarının, KİV-lərin və QHT-lərin nümayəndələri, bu şəhərdə yaşayan həmyerlilərimiz və tələbələr iştirak ediblər.

Azərbaycanın İstanbuldakı baş konsulu Məsim Hacıyev tədbirdə çıxış edərək abidənin hazırlanmasına və məhz Behbud xan Cavanşirin qətlə yetirildiyi ərazidə yerləşdirilməsinə göstərilən köməyə görə Türkiyə Xarici İşlər Nazirliyinə, İstanbul Valiliyinə, Beyoğlu Bələdiyyəsinə və “SOCAR Turkey Enerji A.Ş.”yə təşəkkürünü bildirib.

Baş konsul qeyd edib ki, Prezident İlham Əliyev Azərbaycan Xalq Cümhuriyyətinin qurucularının xatirələrinin əbədiləşdirilməsi məqsədilə 2018-ci ildə Sərəncam imzalayıb. Konsulluq tərəfindən Sərəncamın icrası istiqamətində mütəmadi olaraq işlər aparılır. Bu məqsədlə ilk olaraq AXC-nin qurucularının İstanbulda yerləşən məzarları təmir olunub və 2018-ci ildə məzarların yerləşdiyi qəbiristanlıqda onların xatirəsinə abidə ucaldılıb.

Behbud xan Cavanşirin xatirə abidəsinin Beyoğlu rayonunda yerləşdirilməsinin Azərbaycan xalqının ümummilli lideri Heydər Əliyevin “Bir millət, iki dövlət” şüarının bir nümunəsi olduğunu deyən M.Hacıyev bildirib: “Abidənin yerləşdiyi Beyoğlu rayonu İstanbulun ən çox ziyarətçi qəbul edən rayonlarındandır. Belə ki, buranı gün ərzində 2 milyondan çox insan ziyarət edir. Həmin insanlar hər dəfə bu ərazidən keçərkən bir daha erməni terrorizminin şahid olacaqlar”.

“Azərbaycan xalqının yaşadığı acı bizim acımızdır”, - deyən Beyoğlu Bələdiyyəsinin sədri Haydar Ali Yıldız bildirib: “Başda Qarabağ olmaqla, Azərbaycanın tarixində yaşananları xatırlamaq və unutmamaq çox vacibdir. Biz bununla yaşananların unudulmaması, azərbaycanlı qardaşlarımızın tarixinə düşmüş qanlı səhifələrin, qətlə yetirilən dövlət xadimlərinin və diplomatların xatirələrinin əbədiləşdirilməsi istiqamətində üzərimizə düşən vəzifəni yerinə yetirdik. Bu, eyni zamanda, qardaşımıza qarşı törədilən hansısa hadisənin bizə də təsir etməsinin bir nümunəsidir”.

1921-ci il iyulun 18-də “Daşnaksütyun” erməni terror təşkilatının üzvü Misak Torlakyan tərəfindən qətlə yetirilən Azərbaycanın görkəmli dövlət xadimi Behbud xan Cavanşir Qarabağ xanlığının əsasını qoymuş Pənahəli xanın nəticəsi Azad xanın oğlu olub. 1918-ci il iyunun 17-də Fətəli xan Xoyskinin yaratdığı hökumətdə Daxili İşlər naziri vəzifəsini tutan Behbud xan Cavanşirin Azərbaycanda bu sistemin formalaşmasında xidmətləri danılmazdır. O, eyni zamanda, ölkənin Ticarət və Sənaye naziri kimi də fəaliyyət göstərib.

Günel Məlikova

AZƏRTAC-ın xüsusi müxbiri

İstanbul