Gəncə, 25 fevral, Elcan Məmmədov, AZƏRTAC

Gəncə Şəhər Ağsaqqallar Şurası, Gəncə Şəhər İcra Hakimiyyəti və Azərbaycan Texnologiya Universitetinin (ATU) birgə təşkilatçılığı ilə Ümummilli Lider Heydər Əliyevin 100 illiyinə həsr edilən “Gənclərin vətənpərvərlik ruhunda tərbiyəsi ölkəmizin gələcəyinin rəhnidir” mövzusunda konfrans keçirilib.

AZƏRTAC-ın bölgə müxbiri xəbər verir ki, əvvəlcə Azərbaycan Texnologiya Universitetinin binasında Ulu Öndər Heydər Əliyevin büstü ziyarət edilib, önünə gül dəstələri düzülüb. Sonra tələbələrinin vətənpərvərlik mövzusundakı rəsmlərindən ibarət sərgiyə baxış keçirilib.

Tədbir Dövlət Himninin səsləndirilməsi və Ulu Öndər Heydər Əliyevin, Vətən uğrunda canından keçən şəhidlərimizin, eləcə də Xocalı soyqırımı qurbanlarının və qardaş Türkiyədə zəlzələ nəticəsində həyatını itirən soydaşlarımızın xatirəsinin yad edilməsi ilə başlayıb.

Konfransda ATU-nun rektor əvəzi Yaşar Ömərov çıxış edərək milli-mənəvi dəyərlərimizdən, gənc nəslin vətənpərvərlik ruhunda tərbiyəsindən və bu sahədə təhsil müəssisələrinin, o cümlədən Universitetin üzərinə düşən məsuliyyətli vəzifələrdən söz açıb. Təhsil proqramlarında, dərsliklərdə maarifləndirici mövzuların daha da artırılmasının, 44 günlük Vətən müharibəsi qəhrəmanlarının, Şuşa fatehlərinin, Polad Həşimov və digərləri kimi igid Azərbaycan oğullarının örnək həyat yollarının geniş təbliğ olunmasının vacibliyindən bəhs edib.

Gəncə Şəhər İcra Hakimiyyətinin şöbə müdiri Yadigar Bədəlov çıxışında bu gün Azərbaycanda, o cümlədən Gəncə şəhərində gənclərin tərbiyəsi, onların vətənpərvərlik ruhunda yetişdirilməsi ilə bağlı aparılan işlərdən danışıb. Ulu Öndər Heydər Əliyevin layiqli davamçısı Prezident İlham Əliyevin bu sahəyə, gələcəyimiz olan gənclərə xüsusi diqqət ayırdığını vurğulayıb.

Gəncə Şəhər Ağsaqqallar Şurasının sədri Nurəddin Məmmədov gənclərlə bağlı keçirdikləri bir sıra tədbirlərdən, o cümlədən Ulu Öndər Heydər Əliyev tərəfindən təsis edilən Gənclər Gününə həsr olunmuş tədbirdən bəhs edərək dövlətimiz tərəfindən gənc nəslə göstərilən diqqət və qayğıdan söz açıb. Vurğulayıb ki, Ümummilli Lider Heydər Əliyevin 100 illiyinə həsr edilmiş bugünkü konfransın da əsas məqsədi gənclərdə vətənpərvərlik hissinin gücləndirilməsi, onların təhsilə, elmə daha çox önəm vermələri, savadlı və bilikli kadrlar olaraq vətənimiz Azərbaycanın hərtərəfli inkişafına xidmət etmələridir.

Sonra Gəncə Dövlət Universitetinin professoru Həsənbala Sadıqov “Milli dəyər olan vətənpərvərlik tərbiyəsinin əsas istiqamətlərinə dair”, Azərbaycan Texnologiya Universitetinin dosenti Hüseyn Budaqov “Heydər Əliyev gənclərin vətənpərvərlik tərbiyəsi haqqında” adlı məruzələri dinlənilib, o cümlədən YAP Gəncə Şəhər təşkilatının nümayəndəsi, şəhid valideynləri, Birinci və İkinci Qarabağ müharibələri qaziləri, tələbələr çıxış edərək gənclərin vətənpərvərlik ruhunda yetişmələri üçün görülən işlərdən, qarşıda duran vəzifələrdən danışıblar.

Azərbaycan Ağsaqqallar Şurasının sədr müavini Bayram Yusifov tədbirin bütün cəmiyyətimiz üçün aktual olan bir mövzuya həsr olunduğunu qeyd edib. Bildirib ki, gənclərimizə öncə ailədən başlayan, sonra orta və ali məktəblərdə formalaşan vətənpərvərlik ruhunun aşılanmasının daha da gücləndirilməsi istiqamətində məqsədəuyğun və sistemli iş aparılmalıdır. Gələcəyimizin gənclərimizin əlində olduğunu bildirən Bayram Yusifov vurğulayıb ki, Ulu Öndərin zəngin irsi, vətənpərvərliyi gənclər üçün əsas istinad nöqtəsidir. O, həmçinin diqqətə çatdırıb ki, Prezident, Müzəffər Ali Baş Komandan İlham Əliyevin ölkəmizə rəhbərliyi dövründə yüksək ideallara xidmət edən vətənpərvər gənc nəsil yetişib, 44 günlük Vətən müharibəsində igid gənclərimizin misilsiz şücaətlər göstərməsi bunun bariz nümunəsidir.

Sonra Nurəddin Məmmədov Bayram Yusifova yubileyi münasibətilə təbriklərini çatdıraraq, ona xatirə hədiyyəsi təqdim edib.

Həmçinin konfrans çərçivəsində səmərəli ictimai fəaliyyətlərinə görə bəzi tədbir iştirakçılarına Fəxri fərmanlar, təşəkkürnamələr və tərifnamələr verilib.