® “Azercell” müştərilərini mobil tətbiqlərdən və sosial şəbəkələrdən istifadə edərkən diqqətli olmağa çağırır
Vatsap və digər tətbiqlərdə təhlükəsizlik pozuntuları ilə bağlı dünya miqyasında baş verən bir sıra hadisələri diqqət mərkəzində saxlayaraq, “Azercell” abunəçilərini cihaz və telefon nömrələrini potensial haker hücumlarından qorumaq üçün priventiv tədbirlər görməyə çağırır.
Bu cür hücumların sayının artmasını və bunun nəticəsində şirkətə son günlər ərzində daxil olan çoxsaylı sorğuları nəzərə alan mobil operator, məlumat təhlükəsizliyinin təmin edilməsi ilə bağlı tövsiyələri abunəçilər ilə bölüşür: Telefonlarınızı nəzarətsiz qoymayın; vatsap tətbiqi, SMS və digər kanallar üzərindən göndərilən şübhəli məzmunlu keçidlərə, sorğu və ismarışlara reaksiya verməyin; Şübhəli zənglərə cavab verməyin; Etibar doğurmayan internet saytlardan istifadə etməyin; Şübhəli məzmunlu müxtəlif oyun, yarışma və sair təkliflərdən yararlanmayın; Vatsapdan qeydiyyatdan keçmək üçün nömrəyə göndərilən 6 rəqəmli şifrəni heç kimlə bölüşməyin; İstifadənizdə olan nömrənin vatsap hesabı yaradılarkən sizə SMS vasitəsilə 6 rəqəmli şifrə göndərilir; Vatsap hesabınızın təhlükəsizliyini qorumaq üçün bu şifrə gizli saxlanılmalıdır və heç kimlə bölüşülməməlidir; Vatsapda şəxsi 6 rəqəmli təhlükəsizlik şifrəsi yaradın.
Vatsap istifadəçiləri şəxsi 6 rəqəmli təhlükəsizlik şifrəsi yarada bilərlər. Bunun üçün proqram parametrlərində “İki addımlı təsdiqetmə” funksiyası aktiv edilməli sonra müvafiq xanalara təhlükəsizlik şifrəsi və e-poçt ünvanı əlavə olunmalıdır.
“Azercell” abunəçilərinin məlumat təhlükəsizliyini təmin etmək və onlara ən yaxşı müştəri təcrübəsini təqdim etmək üçün bu növ məlumatları müntəzəm olaraq onlarla paylaşmağa davam edəcək.
Qeyd edək ki, “Azercell” tətbiqlərdən və ya sosial şəbəkələrdən yararlanmaq üçün yalnız mobil internet bağlantısını təmin edir. Tətbiqlərə və sosial şəbəkələrə aid istifadəçi hesablarının təhlükəsizlik və istifadə şərtləri “Azercell” tərəfindən idarə olunmur. Məhz bu səbəbdən bu mövzularda yaranan sual və çətinliklər müvafiq proqramın dəstək xəttinə yönləndirilməlidir.
Bölmənin digər xəbərləri
