İlmələrdə yaşayan yaddaş: Bakıda beynəlxalq qobelen sərgisi
Bakı, 8 iyun, AZƏRTAC
İyunun 8-də Şirvanşahlar Sarayında qobelen və tekstil sənətinə həsr olunmuş “TOMA – Yaddaşın ilmələri: Xatirədən gələcəyə” adlı beynəlxalq qobelen müsabiqəsi və sərgisinin açılış mərasimi keçirilib.
AZƏRTAC xəbər verir ki, layihə Azərbaycan tekstil sənətinin görkəmli nümayəndəsi, professor Tamila Məmmədovanın xatirəsinə həsr olunub.
Tədbiri açan İçərişəhər Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud bildirib ki, Tamila Məmmədova yüksək mədəniyyəti, zəngin daxili aləmi və dərin intellekti ilə seçilən, sənətinə böyük sevgi ilə yanaşan şəxsiyyət olub. Onun sözlərinə görə, sənətkarın xatirəsinə həsr olunan belə bir platforma onun irsinin yaşadılmasına və gələcək nəsillərə ötürülməsinə xidmət edəcək.
İncəsənət tarixçisi və tənqidçisi, Polşanın Lodz şəhərində yerləşən Mərkəzi Tekstil Muzeyinin baş kuratoru Marta Kovalevska çıxışında qeyd edib ki, Tamila Məmmədovanın yaradıcılıq irsi və sənət baxışları bu gün də tələbələri və davamçıları üçün mühüm ilham mənbəyidir. O bildirib ki, sənətkarın Azərbaycan tekstil sənətinin inkişafına verdiyi töhfələr və formalaşdırdığı məktəb gələcək nəsillər tərəfindən yaşadılacaq.
Litva Rəssamlar İttifaqının prezidenti, Vilnüs İncəsənət Akademiyasının professoru, tekstil rəssamı Egle Qanda Boqdaniene beynəlxalq səviyyəli belə genişmiqyaslı sərgi və müsabiqənin qısa müddətdə təşkil olunmasını yüksək qiymətləndirib. O vurğulayıb ki, layihə yalnız sərgi funksiyası daşımır, eyni zamanda, yeni əməkdaşlıqların və beynəlxalq əlaqələrin inkişafı üçün mühüm platformadır.
Sonra Tamila Məmmədovanın tələbələri, sənət dostları və nəvəsi Nuriyyə Əzimova çıxış edərək, sənətkarla bağlı xatirələrini bölüşüblər.
Tədbirdə Tamila Məmmədovanın həyat və yaradıcılıq yoluna həsr olunmuş sənədli film nümayiş etdirilib.
“Azərxalça” ASC-nin İdarə Heyətinin sədri, Əməkdar incəsənət xadimi Emin Məmmədov bildirib ki, təşəbbüs, ümumilikdə, tekstil sənəti ilə məşğul olan rəssamların dəstəklənməsinə xidmət edir. Onun sözlərinə görə, layihə qısa müddətdə həyata keçirilsə də, müsabiqəyə 40-dan çox iştirakçı tərəfindən 150-dən artıq əsər təqdim olunub. Xarici ölkələrdən olan müəlliflərin də qatıldığı müsabiqədə işlər beynəlxalq münsiflər heyəti tərəfindən qiymətləndirilib.
Sonra müsabiqənin qalibləri mükafatlandırılıb.
Tamila Məmmədova Fondunun təsisçisi Aliyə Əzimova çıxışında bu günün onun həyatının ən həyəcanlı günlərindən biri olduğunu vurğulayıb. “Bu təşəbbüsün uğuru yalnız bu gün keçirilən tədbirlərlə ölçülməyəcək. Onun əsl dəyəri gələcəkdə ilham verəcəyimiz sənətkarlarda, quracağımız əməkdaşlıqlarda, qoruyacağımız biliklərdə və üzə çıxaracağımız yeni ideyalarda öz əksini tapacaq”, – deyə A.Əzimova bildirib.
Qeyd edilib ki, rəssamları, kuratorları, tədqiqatçıları, dizaynerləri və mədəniyyət institutlarını bir araya gətirən TOMA layihəsi ənənəvi tekstil irsi ilə müasir incəsənət arasında dialoqu gücləndirməyi hədəfləyir. Təşəbbüs qobeleni yalnız dekorativ sənət növü kimi deyil, yaddaş, material, məkan və müasir vizual mədəniyyətlə əlaqəli canlı bədii ifadə vasitəsi kimi təqdim edir.
Layihə çərçivəsində qobelen, fiber art və tekstil əsaslı müasir sənət sahəsində çalışan yerli və xarici müəlliflərin əsərləri nümayiş olunub.
Bölmənin digər xəbərləri
