Vaşinqton, 22 noyabr (AZƏRTAC). Azərbaycanın ABŞ-dakı səfiri Elin Süleymanov İndiana ştatına səfəri çərçivəsində Bluminqton şəhərində yerləşən İndiana Universitetində geniş auditoriya qarşısında çıxış etmişdir.

E.Süleymanov Azərbaycanın dövlətçilik ənənələrindən bəhs edərək Azərbaycan Xalq Cümhuriyyətinin fəaliyyətindən, Şərqdə ilk parlamentli respublikanın ölkəmizdə yaradılmasından, qadınlara səsvermə hüququnun verilməsindən danışmışdır. Müstəqilliyini bərpa etdikdən keçən 22 il ərzində Azərbaycanın beynəlxalq arenada nüfuzunun getdikcə daha da artdığını bildirən səfir ölkəmizin BMT Təhlükəsizlik Şurasına qeyri-daimi üzv seçilməsinin buna bariz nümunə olduğunu qeyd etmişdir.

Azərbaycanın dövlət müstəqilliyinin bərpasından sonra enerji sektorunda köklü dəyişikliklərin baş verdiyini və enerji diplomatiyasının ilkin rüşeymlərinin formalaşdığını bildirən səfir bu xüsusda 1994-cu ildə imzalanmış “Əsrin müqaviləsi” barədə məlumat vermişdir. O, ABŞ hökumətinin regionla bağlı ən uğurlu layihəsi olan bu müqavilənin dövrün reallıqları fonunda ümummilli lider Heydər Əliyevin uzaqgörən strateji baxışının nəticəsi olduğunu bildirmişdir. Həmin müqavilə ilə Xəzər dənizinin Qərbə açıldığını bildirən səfir Azərbaycanın enerji diplomatiyasının əsasında enerji resurslarının nəqli yollarının şaxələndirilməsinin mühüm amil olduğunu demişdir. Diplomat Azərbaycanın hazırkı uğurlu iqtisadi inkişafının təsadüfi deyil, ölkə rəhbərliyinin düzgün strategiyasının göstəricisi olduğunu əlavə etmişdir. Hazırda dünya enerji bazarında təbii qazın nəqlinin daha aktual olduğunu qeyd edən səfir bu xüsusda gündəmdə olan layihələrə toxunmuş, xüsusilə “Cənub” qaz dəhlizi layihəsi barədə məlumat vermiş və bu layihələrin regional inteqrasiyaya öz töhfəsini verəcəyinə ümidvar olduğunu qeyd etmişdir. Ümumilikdə reallaşdırılan layihələrin Azərbaycanla yanaşı, Türkiyəni də vacib tranzit dövlətinə çevirdiyini, Gürcüstanın isə sosial iqtisadi rifahında mühüm rol oynadığını qeyd edən səfir ölkəmizin Avropanın enerji təhlükəsizliyinin təminində önəmli rol oynamasından bəhs etmişdir.

E.Süleymanov Ermənistan-Azərbaycan, Dağlıq Qarabağ münaqişəsi barədə məlumat verərək ABŞ-ın da həmsədrlərindən biri olduğu Minsk qrupunun vasitəçilik səyləri çərçivəsində problemin ədalətli həllini tapmasının Azərbaycan və erməni xalqlarının ümumi rifahına xidmət edəcəyini və regionun daha da inkişafı üçün yeni perspektivlər açacağını demişdir. Hərtərəfli regional inteqrasiyaya mane olan əsas amilin Dağlıq Qarabağ münaqişəsi olduğunu bildirən səfir bu problemin ən qısa zamanda həllinin bütün region dövlətləri üçün çox faydalı olacağını bildirmiş və Ermənistan hakimiyyətinin tezliklə qeyri-konstruktiv mövqeyindən əl çəkib erməni xalqının rifahına və ümumilikdə regionun parlaq gələcəyinə hesablanmış addım atacağına ümidvar olduğunu demişdir.

Tədbirdən sonra təşkil olunmuş ziyafətdə “Molla Nəsrəddin” jurnalının müxtəlif buraxılışlarından ibarət sərgi nümayiş etdirilmişdir.

Səfər çərçivəsində səfir E.Süleymanov İndiana Universitetinin rəhbərliyi, həmçinin rektoru Maykl Makrobi ilə görüşmüş və potensial əməkdaşlıq sahələrinə dair geniş müzakirələr aparılmışdır.

1820-ci ildə yaradılmış İndiana Universiteti ABŞ-ın ən nüfuzlu ali təhsil ocaqlarından biridir. Universitetdə türk dünyası ölkələri üzrə mərkəz yaradılmışdır və burada müxtəlif türkdilli xalqların adət-ənənələri, tarixi, mədəniyyəti, eləcə də dili öyrədilir.

Yusif Babanlı

AZƏRTAC-ın xüsusi müxbiri

Vaşinqton