ABŞ Prezidentinin elmi məsələlər üzrə xüsusi elçisi Elmin İnkişafı Fondunda olmuşdur
Bakı, 9 mart (AZƏRTAC). ABŞ Prezidenti Barak Obamanın təhsil və elm sahələrində əlaqələrin möhkəmləndirilməsi təşəbbüsü çərçivəsində ölkəmizdə səfərdə olan Birləşmiş Ştatların dövlət başçısının elmi məsələlər üzrə xüsusi elçisi, tanınmış kimyaçı-mühəndis və “Lehigh” Universitetinin rektoru xanım Elis Qastın başçılıq etdiyi nümayəndə heyəti martın 9-da Azərbaycan Respublikasının Prezidenti yanında Elmin İnkişafı Fondunda olmuşdur.
Qonaqlara Fondun fəaliyyəti, beynəlxalq əlaqələri, qrant müsabiqələrinin keçirilməsi sisteminin əsas prinsipləri, elmi prioritetlərin seçilməsi, ekspertiza işinin təşkili, birgə qrant müsabiqələrinin keçirilməsi haqqında ətraflı məlumat verilmişdir.
Fondun qısa müddət ərzində qazandığı nailiyyətlər qonaqlar tərəfindən yüksək qiymətləndirilmişdir.
Fondda ABŞ-ın müvafiq qurumları ilə əməkdaşlıq məsələləri də müzakirə olunmuşdur. Xanım E.Qast elmi nəticələrin iqtisadiyyatda və istehsalatda tətbiqi, innovativ ideyaların həyata keçirilməsi, enerji, informasiya texnologiyaları və nanotexnologiyalar sahələrinə diqqətin artırılmasının əhəmiyyətini vurğulamış, bu işdə hər cür yardım göstərməyə hazır olduğunu bildirmişdir.
######
Bölmənin digər xəbərləri
