Adil Əliyev: Bu gün Kəlbəcərə yeni nəfəs gəlir, insanların doğma yurda qayıtmaq arzusu reallaşır
Bakı, 25 noyabr, AZƏRTAC
Dövlətimizin başçısının bu ilin yayında imzaladığı Sərəncama əsasən, noyabrın 25-i uzun illər düşmən işğalında qalmış Kəlbəcər rayonunun azad edildiyi gün kimi xüsusi qeyd edilir. 1990-cı illərin əvvəllərində azərbaycanlılara qarşı kütləvi cinayətlər törədən Ermənistanın atdığı addımlar təəssüf ki, Kəlbəcər rayonundan da yan keçmədi. Qədim türk yurdu və Azərbaycanın ayrılmaz hissəsi olan Kəlbəcər 1993-cü ildə Ermənistan tərəfindən işğal olundu. 1993-cü il aprelin 2-də rayonunun işğalı zamanı 511 nəfər dinc həmvətənlimiz qəddarcasına öldürüldü, 321 nəfər isə əsir götürüldü.
AZƏRTAC xəbər verir ki, bu sözləri Milli Məclis sədrinin müavini Adil Əliyev söyləyib.
A.Əliyev qeyd edib ki, Kəlbəcərin Ermənistan tərəfindən işğalı ilə 50 mindən çox Azərbaycan vətəndaşı 30 il ərzində məcburi köçkün həyatı yaşamağa məcbur olub, məhz bu, erməni vandalizminin iç üzüdür. Kəlbəcər rayonundan olan məcburi köçkünlər əzizlərini itirməklə bərabər, uzun illər doğma Vətənin həsrətini çəkiblər. Bu məhrumiyyətlərlə yanaşı, məhz beynəlxalq ictimaiyyətin baş verənlərə səssiz qalması, reaksiya verməməsi ikili standartların əyani nəticəsi idi. Kəlbəcərin Ermənistan tərəfindən işğalı faktını təsdiqləyən, Ermənistan hərbi qulluqçularının işğal altındakı ərazilərdən dərhal və qeyd-şərtsiz çıxarılması ilə əlaqədar Birləşmiş Millətlər Təşkilatının qəbul etdiyi 4 qətnamədən biri - 822 saylı qətnamə qəbul olunub. Lakin bu qətnamələr 27 il ərzində icra olunmadı və kağız üzərində qaldı. İcrası məcburi xarakter daşıyan qətnamələrin yerinə yetirilməməsi Ermənistanın beynəlxalq hüquqa və beynəlxalq ictimaiyyətə verdiyi “dəyər”in təzahürü idi. Məhz kəlbəcərlilər məruz qaldıqları ikili standartlara görə uzun illər doğma yurdlarına qovuşa bilmədilər.
2020-ci ilin sentyabrın 27-də başlanmış genişmiqyaslı hərbi əməliyyat Azərbaycan Ordusunun 44 gün davam edən Zəfər yürüşü ilə tamamlandı, qəhrəmanlarımız bizə tarixi Qələbə bəxş etdilər. Rəşadətli Azərbaycan Ordusuna rəhbərlik edən Prezident, Müzəffər Ali Baş Komandanın göstərişlərinə uyğun olaraq hərbi qulluqçularımız ilk günlərdən etibarən həm də Kəlbəcər istiqamətində hücum əməliyyatına keçdilər. Aparılan ardıcıl uğurlu əməliyyatlar nəticəsində bu istiqamətdə yüksəkliklər düşmən işğalından azad olundu. Eləcə də hərbi qulluqçularımız Basarkeçər-Kəlbəcər yolunu nəzarətdə saxlamaqla düşmənin Ermənistanla əlaqəsini kəsərək bu yoldan istifadənin qarşısını aldılar. Azərbaycan Silahlı Qüvvələrinin apardığı uğurlu əməliyyatlar nəticəsində tarixi Qələbə qazandıq və Ermənistan kapitulyasiya aktına imza atmağa məcbur oldu. Üçtərəfli Bəyanat imzalanarkən Ermənistanın üzərinə götürdüyü öhdəliklərdən biri də Kəlbəcər rayonunun təhvil verilməsi idi. Nəticədə noyabrın 25-də düşmən Kəlbəcər rayonunu birdəfəlik tərk etdi. Kəlbəcər rayonundan çıxanlar öz barbarlıqlarını, işğalçı, dağıdıcı mahiyyətlərini bir daha dünyaya nümayiş etdirdilər. Rayondan çıxarkən evlərini, məktəblərini və digər əmlaklarını yandırmaqla bərabər, meşələri də məhv etdilər.
Kəlbəcər rayonunda quruculuq işləri yüksək sürətlə davam edir
Dövlətimizin başçısının göstərişi ilə bu gün Qarabağda və Şərqi Zəngəzurda aparılan abadlıq və quruculuq işləri çərçivəsində Kəlbəcərdə də genişmiqyaslı işlər həyata keçirilir. Prezident və Birinci vitse-prezident mütəmadi olaraq həmin ərazilərə səfərlər edərək görülən işlərlə yerindəcə tanış olur, yaşayış məntəqələrinin, xəstəxanaların və məktəblərin təməlqoyma mərasimlərində iştirak edirlər.
Bu sahədə görülən işlər keçmiş məcburi köçkünlərin yurdlarına dönmələrinin təmin olunması məqsədilə aparılır. Quruculuq işləri ilə yanaşı, növbəti mərhələdə kəlbəcərlilərin öz yurdlarına dönmələri də planlaşdırılır. Hazırda rayonda elektrik enerjisi istehsal edən müəssisələr, bütün infrastruktur yenidən qurulur, təsdiqlənmiş Baş plana uyğun olaraq sakinlər üçün evlər tikilir.
Prezident İlham Əliyevin rəhbərliyi ilə başlamış “Böyük Qayıdış” prosesi çərçivəsində artıq Talış kəndinə, Füzuliyə, Laçına, Zəngilana və ayrı-ayrı kəndlərə qayıdış gerçəkləşir və bu proses uğurla davam edir. İşğaldan azad olunmuş ərazilərə qayıdan həmvətənlilərimizin rahat yaşaması üçün evlər tikilir, müasir infrastruktur yaradılır, nəticədə uzun illər yurd həsrəti çəkmiş vətəndaşlarımız geri qayıdırlar. Məhz görülən bu işlər nəticəsində Qarabağa və Şərqi Zəngəzura yeni nəfəs gəlir, insanlar doğma yurdlarındadır. Onların məşğulluq və digər məsələləri dövlətimiz üçün prioritetdir, habelə qarşıdakı müddətdə kəlbəcərlilər də növbəli şəkildə öz yurdlarına qayıdacaqlar.
“Azərbaycan Qarabağda və Şərqi Zəngəzurda görülən işlərlə bərabər, regionda sülhün təmin olunması istiqamətində bütün vacib addımları atır. Regionda sülhün bərqərar olunması məqsədilə bütün imkanlar səfərbər edilir. Biz uzunmüddətli sülh arzusundayıq. Ümid edirik ki, Ermənistan da uzun illər törətdiyi qırğınlardan sonra işğalçılıq siyasətindən əl çəkəcək və sülhə öz töhfəsini verəcək”, - deyə A.Əliyev vurğulayıb.
Bölmənin digər xəbərləri
