AĞCABƏDİ RAYONUNUN QARAXANLI KƏNDİNDƏ TOYUQLARIN KÜTLƏVİ TƏLƏFATI BAŞ VERMƏMİŞDİR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, bu məlumatdan dərhal sonra qurumun yerli mütəxəssisləri Qaraxanlı kəndində olmuş, əraziyə baxış keçirmişlər. Baxışda rayon icra hakimiyyətinin nümayəndəsi və kənd bələdiyyəsinin sədri də iştirak etmişlər. Araşdırma zamanı məlum olmuşdur ki, kənddə toyuqların kütləvi tələfatı baş verməmiş, yalnız 3-4 baş ev quşu ölmüşdür. Ölmüş bu quşlar isə bir neçə gün bundan əvvəl kəndin ayrı-ayrı ərazilərindən toplanmış, çəkiliş üçün bir məhəlləyə gətirilmişdir.
Buna baxmayaraq, ölmüş quşlardan götürülmüş müvafiq nümunələr laboratoriyaya təqdim olunmuşdur. Müayinələr başa çatdıqdan sonra ölümün səbəbləri barədə ictimaiyyətə məlumat veriləcəkdir.
Dövlət Baytarlıq Xidməti əhalini belə yanlış məlumatlara inanmamağa çağırır və bildirir ki, ölkə ərazisində monitorinqlər davam etdirilir. Bu günədək Azərbaycanda “quş qripi” virusu xəstəliyinə təsadüf edilməmişdir.
Xatırladaq ki, sərhədlərdə baytarlıq nəzarəti məntəqələri ciddi iş rejimində fəaliyyət göstərir, rayonların baytarlıq idarələri kifayət qədər dezinfeksiyaedici maddələrlə təmin edilmişdir, xəstəlik qeyd olunan ölkələrdən diri quş, quş məhsulları, yem və yem əlavələrinin gətirilməsinə, habelə köçəri quşların ovlanmasına qoyulmuş qadağa qüvvədə qalır.
Bölmənin digər xəbərləri
