Ağcabədidə iki yem emalı müəssisəsi istifadəyə verilib
Bakı, 30 mart, AZƏRTAC
Ağcabədi rayonunun Təzəkənd və Kəhrizli kəndlərində yem emalı müəssisələri istifadəyə verilib.
İqtisadiyyat Nazirliyinin mətbuat xidmətindən AZƏRTAC-a bildirilib ki, yem emalı müəssisələrinin istifadəyə verilməsi ilə bağlı Kiçik və Orta Biznesin İnkişafı Agentliyinin (KOBİA) təşkilatçılığı ilə keçirilmiş tədbirlərdə yem emalı müəssisələrinin Azərbaycan Hökuməti və ABŞ-ın Beynəlxalq İnkişaf Agentliyi tərəfindən birgə həyata keçirilən "Sosial-iqtisadi inkişaf fəaliyyəti" (SEDA) layihəsi çərçivəsində istifadəyə verildiyi qeyd olunub.
Təzəkənd və Kəhrizli ilə yanaşı, yem emalı müəssisələrindən ətraf kəndlərdə yaşayan sakinlər də istifadə edə biləcək. Yem emalı müəssisələrində yem emalı üçün istehsal sahəsi və anbar inşa olunub, hər birinin gücü saatda 2 ton olan toxum təmizləyən, yem üyüdən və otdoğrayan avadanlıqlar quraşdırılıb, yeni iş yerləri açılıb.
Tədbirlərdə çıxış edən KOBİA-nın idarə heyəti sədrinin müavini Faiq Abbasov, ABŞ-ın Beynəlxalq İnkişaf Agentliyinin layihə meneceri Pərviz Musayev və Ağcabədi Rayon İcra Hakimiyyətinin Təzəkənd və Kəhrizli kəndləri üzrə nümayəndələri regionlarda icma əsaslı biznesyönümlü layihələrin icrasının, o cümlədən Təzəkənd və Kəhrizli kəndlərində yem emalı müəssisələrinin istifadəyə verilməsinin aqrar sektorda mikro və kiçik sahibkarlığın inkişafında, heyvandarlıq və bitkiçilik sahəsində fəaliyyətin genişləndirilməsində, yemə olan tələbatın ödənilməsində və məşğulluğun artırılmasında əhəmiyyətli olduğunu diqqətə çatdırıblar.
Kənd sakinləri göstərilən diqqət və qayğıya görə dövlət başçısına minnətdarlıqlarını bildiriblər.
Bölmənin digər xəbərləri
