REGİONLAR
Ağcabədidə şəhid ailələri və qazilər dövlətin diqqət və qayğısı ilə əhatə olunublar
![](/files/galleryphoto/2022/3/1200x630/16656809422150831947_1200x630.jpg)
![](/files/galleryphoto/2022/3/1200x630/1665680942101378364_1200x630.jpg)
![](/files/galleryphoto/2022/3/1200x630/166568094296702625_1200x630.jpg)
![](/files/galleryphoto/2022/3/1200x630/16656809424278416923_1200x630.jpg)
![](/files/galleryphoto/2022/3/1200x630/16656809424507839782_1200x630.jpg)
![](/files/galleryphoto/2022/3/1200x630/16656809426552429228_1200x630.jpg)
![](/files/galleryphoto/2022/3/1200x630/16656809426246534103_1200x630.jpg)
Ağcabədi, 13 oktyabr, AZƏRTAC
Ağcabədi rayonundan 3000 nəfərə yaxın şəxs 44 günlük Vətən müharibəsində iştirak edib. Müharibə nəticəsində rayondan 1 nəfər mülki olmaqla 42 nəfər şəhid olub, 310 nəfər yaralanıb, 63 nəfər müharibə iştirakçısının əlillik dərəcələri müəyyən edilib. 2022-ci il sentyabrın 12-14-də erməni silahlı qüvvələrinin genişmiqyaslı təxribatı nəticəsində Ağcabədi rayonundan Fərzəliyev Emin Elnur oğlu şəhidlik zirvəsinə ucalıb.
AZƏRTAC-ın bölgə müxbiri xəbər verir ki, bu barədə Ağcabədi Rayon İcra Hakimiyyəti (RİH) yanında Şəhid ailəsi üzvləri, əlillik dərəcələri təyin olunmuş müharibə iştirakçıları və “Müharibə veteranları” ilə işin təşkilinə dair Komissiyanın hesabat yığıncağında bəhs edilib. Yığıncaqda Ağcabədi Rayon İcra Hakimiyyətinin başçısı, RİH başçısı aparatının məsul işçiləri, sözügedən komissiyanın üzvləri, hüquq-mühafizə orqanlarının rəhbərləri, şəhid ailələri, qazilər, müharibə veteranları və iştirakçıları, idarə, müəssisə və təşkilat rəhbərləri, inzibati ərazi dairələri üzrə nümayəndələr, bələdiyyə sədrləri, eləcə də ictimaiyyət və media nümayəndələri iştirak ediblər.
Əvvəlcə Azərbaycanın Dövlət Himni səsləndirilib, torpaqlarımızın azadlığı və ərazilərimizin bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad olunub.
Ağcabədi Rayon İcra Hakimiyyətinin başçısı Rafil Hüseynov çıxış edərək Vətən müharibəsindən, Azərbaycan Ordusunun Prezident, Ali Baş Komandan İlham Əliyevin rəhbərliyi ilə qazandığı şanlı Qələbədən, 44 günlük müharibə zamanı düşmən tərəfindən dinc əhaliyə olan hücumlardan söz açıb. Bildirib ki, rəhbər, ordu və xalqımızın birliyi nəticəsində düşmən “Dəmir yumruğ”un gücünü gördü. İllər keçəcək, amma Ermənistan bu yumruğun zərbəsini unuda bilməyəcək.
Sonra RİH başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Şöhrət Orucovun məruzəsi dinlənilib. Bildirilib ki, rayon icra hakimiyyətinin, hüquq-mühafizə orqanlarının, idarə, müəssisə və təşkilatların rəhbərlərinin, rayon ictimaiyyətinin iştirakı ilə şəhidlərimizin nəşinin gətirilməsi, dəfni, yas, ildönümü mərasimləri və digər mühüm tədbirlər həyata keçirilib, şəhid məzarları mütəmadi olaraq ziyarət edilib. Müharibə zamanı və müharibədən sonrakı dövrdə evinə qayıtmış müharibə iştirakçılarından 168 nəfəri evlərində ziyarət olunub, həmin günlərdə evdə olmayan bütün yaralıların ailələrinə isə yardımlar göndərilib. Bundan başqa, qismən səfərbərliklə hərbi xidmətə cəlb olunmuş rayon sakinləri, eləcə də, müddətdən artıq hərbi xidmət edən qulluqçular və zabitlərin ailələrinə müharibə dövründə rayon icra hakimiyyətinin daxili imkanları hesabına ərzaq sovqatları çatdırılıb. Belə ki, 2020-ci ilin dekabr ayınadək 2200 nəfər Vətən müharibəsi iştirakçısının ailəsinə sovqat verilib. Müharibə zamanı Ağdam, Tərtər və Ağcabədidə təmas xəttinə yaxın kəndlərdə yaşayan və evlərini tərk etməyə məcbur olmuş 20 minə qədər sakin isə rayon icra hakimiyyəti tərəfindən müxtəlif sığınacaqlarda yerləşdirilib, ərzaq, isti geyim və digər lazımi ləvazimatlarla təmin edilib.
Diqqətə çatdırılıb ki, dövlətimizin başçısının tapşırıq və tövsiyələrinə uyğun olaraq Ağcabədidə də şəhid və qazi ailələrinə xüsusi diqqət və qayğı ilə yanaşılır, onların mövcud problemlərinin aradan qaldırılması üçün mütəmadi olaraq tədbirlər həyata keçirilir.
Şəhid adlarının əbədiləşdirilməsi üçün 42 küçəyə Vətən müharibəsi şəhidlərinin adı verilib, həmin küçələrdə xatirə lövhələri qoyulub. Bu günədək yüzdən artıq şəhid ailəsi üzvləri və Vətən müharibəsi iştirakçıları müxtəlif yerli dövlət qurumlarında işlə təmin olunub.
Şöhrət Orucov, həmçinin yeni yaradılmış komissiyanın fəaliyyəti ilə bağlı qarşıda duran işlərdən də söz açıb. Bildirib ki, komissiya üzvlərinin ərazilər üzrə bölgüsü aparılıb, 6 zona üzrə təhkimçilər müəyyənləşdirilib. Bu da həmin ərazilər üzrə problemlərin daha yaxından öyrənilməsinə, bu ailələr ilə daha sıx əlaqə yaradılmasına imkan verəcək.
Yığıncaqda Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi, polkovnik-leytenant Qabil Rzayev, Dövlət Sosial Müdafiə Fondunun Qarabağ Regional Filialının Ağcabədi rayon şöbəsinin müdiri vəzifəsini icra edən Emin Əsədov, Ağcabədi Rayon Mərkəzi Xəstəxanası Publik Hüquqi Şəxsində Qazilərlə iş üzrə mütəxəssis Elbrus Əhmədov, şəhid anası Güleyşə Allahverdiyeva, şəhid atası Mübariz Qəhrəmanov, Qarabağ Müharibəsi Əlilləri, Veteranları və Şəhid Ailələri İctimai Birliyinin Ağcabədi rayon filialının sədri, Qarabağ müharibəsi əlili İsmayıl Məhərrəmov, III qrup Vətən müharibəsi əlili Cavid Allahverdiyev və digərləri çıxış ediblər.