AĞSU ŞƏHƏRİNDƏ MÜASİR MEMARLIĞIN TƏLƏBLƏRİNƏ CAVAB VERMƏYƏN BİNALAR SÖKÜLÜR
Ağsu Rayon İcra Hakimiyyəti tikinti və memarlıq şöbəsinin müdiri Xanlar Hüseynov AZƏRTAC-a bildirmişdir ki, sökülən və yeni layihə ilə təzədən inşa edilən bu cür obyektlərin çoxu ötən əsrin 80-cı illərinin sonu-90-cı illərin əvvəllərində layihəsiz tikilmiş, memarlıq tələblərinə cavab verməyən, şəhərin görkəminə xələl gətirən obyektlərdir. İndi şəhərdə 108 bu cür tikili vardır. Onlardan 12-si tamamilə söküləcəkdir. 26 obyekt isə sökülərək yeni tərtibatda tikilmişdir. Qalan 70 obyektin üstü dəyişdirilir.
Sökülən və yeni tikilən binalar, əsasən, şəhərin mərkəzində, ümummilli liderimiz Heydər Əliyevin adını daşıyan mərkəzi meydanın ətrafında, Bakı-Muğanlı-Yevlax avtomobil yolunun kənarında, habelə şəhərin “Şlaqbaum” adlanan ərazisindədir.
Hazırda mərkəzdə milli memarlıq üslubunda Heydər Əliyev muzeyi, şəhərin şimalında avtovağzal kompleksi tikilir, Ağsu dolaylarının başlanğıcında Heydər Əliyev seyrəngahı salınır.
