Ailə, Qadın və Uşaq Problemləri üzrə Dövlət Komitəsinin yaradılmasının 5 illiyi qeyd edilmişdir
Bakı, 4 fevral (AZƏRTAC). 2006-cı il fevralın 6-da dövlətimizin başçısının Fərmanına əsasən Azərbaycan Respublikasının Ailə, Qadın və Uşaq Problemləri üzrə Dövlət Komitəsi (AQUPDK) yaradılmışdır. Ötən illərdə ölkə rəhbərliyinin komitəyə daimi diqqəti nəticəsində ayrılan büdcə vəsaitləri dəfələrlə artmış, 11 Uşaq və Ailələrə Dəstək Mərkəzi bu qurumun balansına verilmişdir. AQUPDK-nın yaradılmasının 5 illiyi ərəfəsində əməkdaşların bir qrupunun “Dövlət qulluğunda fərqlənməyə görə” medalı ilə təltif olunması komitənin fəaliyyətinə verilən ən yüksək qiymətdir.
Bu fikir fevralın 4-də Ailə, Qadın və Uşaq Problemləri üzrə Dövlət Komitəsinin yaradılmasının 5 illiyi münasibətilə keçirilən tədbirdə qeyd edilmişdir. Tədbirdə dövlət və hökumət qurumlarının nümayəndələri, Milli Məclisin deputatları iştirak etmişlər.
Komitənin sədri Hicran Hüseynova Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyətini yüksək qiymətləndirmişdir. Bildirmişdir ki, Mehriban xanım Əliyeva ölkəmizin ictimai həyatında müstəsna rol oynayan şəxsiyyət kimi qadınlarımızın hüquq və imkan bərabərliyinin genişləndirilməsi, gender balansının qorunması və daha da möhkəmləndirilməsi, uşaqların etibarlı müdafiəsinin təmin olunması prosesinə layiqli töhfələr verir. Bu gün Heydər Əliyev Fondu ölkəmizdə ailə, qadın və uşaq problemlərinin həllinə böyük qayğı ilə yanaşır. Bu istiqamətdə atılan addımlar sırasında “XXI əsrdə qadınlara qarşı zorakılıq əleyhinə” birgə layihə xüsusi yer tutur. Məhz Mehriban xanım Əliyevanın təşəbbüsü və fəal dəstəyi sayəsində “Məişət zorakılığının qarşısının alınması haqqında” Qanun Milli Məclis tərəfindən qəbul edilmişdir.
Qeyd edilmişdir ki, ötən dövrdə komitə tərəfindən ictimaiyyətin müsbət rəyinə səbəb olan ciddi işlər görülmüşdür. Bu müddətdə komitəyə daxil olmuş altı mindən artıq müraciətin demək olar ki, hamısı nəzarətə götürülmüş və onların bir çoxu həllini tapmışdır.
AQUPDK ailələrlə bağlı dövlət siyasətinin təmin edilməsi məqsədi ilə bir sıra tədbirlər həyata keçirmişdir. Ailələr haqqında toplanmış məlumatlara əsasən respublika üzrə statistik məlumat bazası yaradılmışdır. Həyata keçirilən tədbirlər sırasında qadın hüquqlarının təmin edilməsi, bu sahədə qanunvericiliyin təkmilləşdirilməsi bir məqsəd kimi qarşıya qoyulmuşdur.
Bu gün Azərbaycanda qadınların qərar qəbuletmədə və hakimiyyət orqanlarında iştirakı da getdikcə artmaqdadır. Ümumilikdə Milli Məclisin 125 deputatından iyirmi nəfəri qadındır. Bələdiyyə orqanlarında qadınların təmsilçiliyi 4 faizdən 26,5 faizə çatmışdır.
Komitə uşaqların müdafiəsinin gücləndirilməsi, onların hüquqlarının təmin edilməsi sahəsində fəaliyyətin əlaqələndirilməsi məqsədi ilə bir sıra tədbirlər həyata keçirir. Uşaqlarla bağlı geniş tədbirlər proqramı reallaşdırılır. Komitə tərəfindən Uşaq məlumat bazasının yaradılması istiqamətində iş artıq başa çatmaq üzrədir. Uşaqlarla bağlı internet-portal da yaradılmışdır.
Milli Məclisin deputatları Qənirə Paşayeva, Jalə Əliyeva və digər çıxış edənlər komitənin fəaliyyətini yüksək qiymətləndirmişlər. Qeyd edilmişdir ki, bu qurum respublikada ailə, qadın və uşaq problemləri sahəsində dövlət siyasətini həyata keçirir. Gender bərabərliyinin təmin edilməsi komitənin əsas fəaliyyət istiqamətlərindən biridir. Ötən dövrdə qadın problemləri və gender məsələləri üzrə qəbul olunmuş dövlət proqramları komitə tərəfindən uğurla həyata keçirilir.
######
Bölmənin digər xəbərləri
