Marneulidə dostluq və həmrəylik tədbiri: “Qafqazın iki müstəqil səsi”
Tbilisi, 27 may, AZƏRTAC
AZƏRTAC xəbər verir ki, tədbir Gürcüstanın və Azərbaycanın dövlət himnlərinin səsləndirilməsi ilə başlayıb. “Azərbaycan Evi”nin və GAİM-in direktoru Məhəbbət İmanov çıxışı edərək Azərbaycan və Gürcüstan xalqları arasındakı dostluq, qarşılıqlı hörmət və ortaq dəyərlər barədə danışıb. Qeyd edib ki, hər iki ölkənin müstəqillik günlərinin birlikdə təntənəli şəkildə qeyd olunması iki dövlət arasında dostluğun və strateji tərəfdaşlığın bariz nümunəsidir.
Gürcüstan parlamentinin deputatı Zaur Darğallı çıxışında vurğulayıb ki, bu gün iki dost və qardaş xalqın - Gürcüstan və Azərbaycan xalqlarının müstəqillik günləri böyük qürur hissi ilə qeyd olunur. O bildirib ki, 26 may və 28 may tarixləri, sadəcə, təqvimdə qeyd olunan günlər deyil. Bu tarixlər azadlıq uğrunda mübarizənin, milli kimliyin, dövlətçilik iradəsinin və xalqın öz taleyini müəyyən etməsinin rəmzidir.
“1918-ci ildə həm Gürcüstan, həm də Azərbaycan müstəqilliklərini elan ediblər. O çətin dövrdə xalqlarımız azadlıq, dövlətçilik və gələcək uğrunda eyni idealları bölüşürdü. Sonrakı illərdə hər iki xalq sovet hakimiyyəti altında müstəqilliyini itirsə də, azadlıq arzusu heç vaxt sönmədi. 1991-ci ildə isə həm Gürcüstan, həm də Azərbaycan dövlət müstəqilliklərini yenidən bərpa edərək yeni tarix yazmağa başladı. Bu yeni mərhələdə xalqlarımız arasında dostluq və əməkdaşlığın möhkəmlənməsində böyük siyasi xadimlər - Azərbaycan xalqının Ümummilli Lideri Heydər Əliyev və Eduard Şevardnadzenin uzaqgörən siyasəti mühüm rol oynayıb”, - deyə Zaur Darğallı bildirib.
Marneuli meri Daur İsmayılov çıxışında Gürcüstan və Azərbaycan xalqlarını dövlət müstəqilliyi günləri münasibətilə təbrik edərək bildirib ki, bu əlamətdar günlər xalqlarımızın azadlıq, suverenlik və milli birlik uğrunda apardıqları mübarizənin rəmzidir. Vurğulayıb ki, Marneuli bu dostluğun ən gözəl nümunələrindən biridir. Burada müxtəlif millətlərin nümayəndələri qarşılıqlı hörmət, mehriban qonşuluq və ortaq dəyərlər əsasında yaşayırlar.
Dmanisi meri Koba Muradaşvili çıxışında bildirib ki, bu gün Gürcüstan və Azərbaycanın müstəqillik günləri böyük qürur və ehtiram hissi ilə qeyd olunur. Onun sözlərinə görə, bu mühüm tarixlər xalqların azadlıq uğrunda mübarizəsinin, milli birliyinin və dövlətçilik iradəsinin təntənəsidir.
Bütün Gürcüstan Müsəlmanları İdarəsinin müftisi Etibar Eminov çıxışında bildirib ki, Uca Yaradanın lütfü ilə Gürcüstan və Azərbaycan xalqları çətin sınaqlardan keçərək dövlət müstəqilliklərini qoruyub, inkişaf və sabitlik yolunda mühüm nailiyyətlər əldə ediblər. O qeyd edib ki, bu əlamətdar günlər birlik, həmrəylik, qarşılıqlı hörmət və sülhün cəmiyyətin əsas dayaqları olduğunu bir daha xatırladır.
Tədbirin ikinci hissəsində GAİM-in nəzdində fəaliyyət göstərən “Sarvan” folklor ansamblı tərəfindən Azərbaycan və gürcü milli rəqsləri - “Yallı” və “Raculi” təqdim olunub. Tanınmış solist Şaban Məmmədov “İori” və Azərbaycan xalq mahnılarını, İamze Cağeli “Ey Vətən” və gürcü milli mahnılarını, Ramin Pirməmmədov tarda “Arazbarı” və “Vətən yaxşıdır”, aşıq Nargilə Mehdiyeva isə “Paşa köçdü” mahnılarını ifa ediblər.
Bölmənin digər xəbərləri
