TÜMER sədri: Azərbaycan Türk dünyasının birliyinin əsas aktorlarından biridir
İstanbul, 29 sentyabr, AZƏRTAC
Türk Strateji Düşüncə Mərkəzinin (TÜMER) sədri Onur Beyhan Azərbaycanın Türk dünyasındakı rolu, Azərbaycan-Türkiyə münasibətləri və Türk dövlətləri arasında inkişaf edən əməkdaşlıqla bağlı AZƏRTAC-a açıqlama verib.
Onur Beyhan bildirib ki, XXI əsrdə Azərbaycanın yüksəlişini yalnız Cənubi Qafqaz çərçivəsində qiymətləndirmək kifayət deyil. Azərbaycan bu gün Türk dünyasının Turan ideyası baxımından mühüm düşüncə mərkəzlərindən, türkçülük fəlsəfəsinin əsas ocaqlarından biridir. 1990-cı illərin mürəkkəb dövlətçilik mərhələsindən sonra Ulu Öndər Heydər Əliyevin formalaşdırdığı dövlətçilik xətti Azərbaycanın bugünkü gücünün əsasını qoydu. Prezident İlham Əliyevin rəhbərliyi dövründə isə bu xətt yeni mərhələyə yüksəldi və Azərbaycanın ərazi bütövlüyünün bərpası ilə mühüm tarixi nəticə əldə edildi.
Azərbaycanın artıq Türk dünyasının inteqrasiyasında fəal və qabaqcıl rol oynayan dövlətlərdən biri olduğunu söyləyən TÜMER sədri qeyd edib: “Bu gün Azərbaycanın dövlət siyasətində Türk dünyasının birliyi, sadəcə, tarixi və mədəni anlayış deyil, konkret siyasi, iqtisadi, nəqliyyat, təhlükəsizlik və humanitar əməkdaşlıq istiqamətinə çevrilib. Prezident İlham Əliyevin “Bizim bir ailəmiz var, o da Türk dünyasıdır” fikri də bu dövlət siyasətinin mahiyyətini ifadə edir.”
O.Beyhan Azərbaycan-Türkiyə münasibətlərinin və Türk dünyası ölkələri arasında əlaqələrin yeni mərhələyə yüksəldiyini vurğulayıb.
“Şuşa Bəyannaməsi Azərbaycan-Türkiyə münasibətlərini müttəfiqlik səviyyəsinə yüksəltdi. Azərbaycanın Özbəkistan, Qazaxıstan və digər Türk dövlətləri ilə dərinləşən münasibətləri isə Türk dünyasında yeni əməkdaşlıq arxitekturasının formalaşdığını göstərir. Azərbaycan bu baxımdan Qərbdəki qardaş Türkiyə ilə Xəzərin şərqindəki Türkistan coğrafiyası arasında təbii və önəmli bir siyasi, iqtisadi, mədəni körpü rolunu oynayır”, - deyə o əlavə edib.
TÜMER sədri Azərbaycanın Türk dünyasının düşüncə tarixindəki mövqeyinə də diqqət çəkib: “Azərbaycanın bu rolu yalnız bugünkü dövlət siyasətindən ibarət deyil. Əli bəy Hüseynzadə, Əhməd bəy Ağaoğlu və digər Azərbaycan-Türk fikir sahiblərinin yaratdıqları irs Türk dünyasının milli düşüncəsinin formalaşmasına mühüm təsir göstərib. Bu baxımdan Azərbaycanın türkçülük düşüncəsinin tarixi ocaqlarından biri olması ilə XXI əsrdə Türk dövlətləri arasında əməkdaşlığın siyasi mərkəzlərindən birinə çevrilməsi arasında mühüm davamlılıq görürəm”.
Onur Beyhan sonda rəhbərlik etdiyi qurumun bu prosesdəki rolunu belə ifadə edib: “TÜMER olaraq bizim məqsədimiz də məhz bu böyük Türk dünyası düşüncəsinin müasir dövrdə intellektual və strateji əməkdaşlığa çevrilməsinə töhfə verməkdir. Türk dünyası alimlərini, diplomatlarını, iş adamlarını, xüsusilə gənc ziyalılarını bir-biri ilə daha sıx əlaqələndirmək, ortaq düşüncə və əməkdaşlıq imkanlarını artırmaq istəyirik. Azərbaycanı bu baxımdan yalnız strateji tərəfdaş deyil, Türk dünyasının şüur və düşüncə mərkəzlərindən biri kimi görürük. TÜMER-in məqsədi də Türk düşüncəsini sistemləşdirmək, strategiyaya çevirmək və Türk dünyasının gələcəyinə xidmət edəcək ortaq düşüncə mühiti formalaşdırmaqdır”.
Bölmənin digər xəbərləri
