Ekspert: Süni intellekt Azərbaycan şirkətləri üçün strateji alətə çevrilir
Bakı, 29 sentyabr, AZƏRTAC
İqtisadiyyatın sürətlə rəqəmsallaşdığı və biznes proseslərinin texnologiya üzərindən qurulduğu bir mərhələdə süni intellektə yalnız gələcəyin texnologiyası kimi yanaşmaq düzgün deyil. Azərbaycan şirkətləri üçün də süni intellekt tədricən əlavə imkan olmaqdan çıxaraq rəqabət qabiliyyətinə, məhsuldarlığa və biznesin inkişafına təsir edən strateji alətə çevrilir.
Bu sözləri AZƏRTAC-a açıqlamasında süni intellekt üzrə ekspert Dilarə Zamanova deyib.
O bildirib ki, əvvəllər şirkətlər süni intellektdən istifadəni daha çox innovativ layihə və ya əlavə üstünlük kimi qiymətləndirirdilər, bu gün isə süni intellekt daha praktik məqsədlərlə tətbiq olunur.
“Məsələn, müştəri müraciətlərinin avtomatlaşdırılması, satış və marketinq məlumatlarının təhlili, maliyyə proseslərinin optimallaşdırılması, sənədlərlə iş, hesabatların hazırlanması, insan resurslarının idarə edilməsi və gündəlik əməliyyatların sürətləndirilməsi kimi proseslərdə süni intellekt şirkətlərə ciddi vaxt və resurs qənaəti verə bilər. Burada vacib məqam ondan ibarətdir ki, süni intellekti tətbiq etmək özü-özlüyündə uğur göstəricisi deyil. Şirkət sadəcə trend olduğu üçün süni intellektdən istifadə edirsə, bunun real biznes nəticəsi olmaya bilər. Əsas məsələ şirkətin hansı problemi həll etmək istədiyini müəyyənləşdirmək və həmin problemə uyğun süni intellekt həllini seçməkdir. Bəzi şirkətlər üçün bu, müştəri xidmətlərinin avtomatlaşdırılması ola bilər, digərləri üçün isə məlumatların analizi, proqnozlaşdırma və ya iş proseslərinin optimallaşdırılması daha faydalı ola bilər”, - deyə Dilarə Zamanova vurğulayıb.
Ekspert qeyd edib ki, Azərbaycan şirkətləri üçün digər mühüm məsələ insan kapitalıdır: “Süni intellektin biznesə inteqrasiyası yalnız texnologiyanın alınması ilə bitmir. Əməkdaşların süni intellekt alətlərindən düzgün istifadə etməsi, nəticələri yoxlaması və bu texnologiyanı mövcud iş proseslərinə inteqrasiya edə bilməsi də vacibdir. Bu baxımdan süni intellekt savadlılığının artırılması şirkətlərin qarşısında duran əsas məsələlərdən birinə çevrilir. Eyni zamanda, şirkətlər süni intellekt tətbiq edərkən məlumat təhlükəsizliyi, məxfilik, müəllif hüquqları və süni intellekt tərəfindən yaradılan məlumatların düzgünlüyü kimi məsələləri də nəzərə almalıdırlar. Çünki AI sürətli nəticə versə də, onun təqdim etdiyi hər məlumat avtomatik olaraq doğru hesab edilə bilməz. İnsan nəzarəti və nəticələrin yoxlanılması xüsusilə biznes qərarlarında vacib olaraq qalır. Buna görə, süni intellekti nə sadəcə bir trend, nə də bütün problemləri həll edən universal vasitə kimi qiymətləndirmək lazımdır. Düzgün strategiya ilə tətbiq edildikdə süni intellekt Azərbaycan şirkətləri üçün məhsuldarlığın artırılması, yeni məhsul və xidmətlərin yaradılması və daha çevik biznes modellərinin qurulması baxımından mühüm imkan yaradır”.
Bölmənin digər xəbərləri
