Vyanada Azərbaycan Xalq Cümhuriyyətinin irsi və müstəqillik ənənələri vurğulanıb
Vyana, 27 may, AZƏRTAC
Avstriyanın paytaxtı Vyanada Azərbaycanın Müstəqillik Günü və Silahlı Qüvvələr Günü münasibətilə rəsmi qəbul keçirilib.
AZƏRTAC xəbər verir ki, ölkəmizin Vyanadakı səfirliyi tərəfindən təşkil olunmuş tədbirin rəsmi hissəsi Azərbaycanın və Avstriyanın dövlət himnlərinin səsləndirilməsi ilə başlayıb.
Səfir Rövşən Sadıqbəyli 1918-ci ildə yaradılmış Azərbaycan Xalq Cümhuriyyətinin yarandığı dövrdən və onun Azərbaycan xalqının tarixində buraxdığı izdən bəhs edərək iştirakçılara ətraflı məlumat verib. O, qısa ömür sürməsinə baxmayaraq cümhuriyyətin təkcə Azərbaycanın deyil, regionun tarixində dərin iz qoyduğunu bildirib, 23 aylıq müddət ərzində görülən işlərin, həyata keçirilən islahatların, dövlət quruculuğu və hüquqi bazanın inkişafının həmin dövr üçün inqilabi xarakter daşıdığını qeyd edib.
R.Saydıqbəyli Ümummilli Lider Heydər Əliyevin sözlərindən iqtibas gətirərək, xalqımızın tarixi nailiyyəti olan dövlət müstəqilliyimizin qorunmasının, möhkəmləndirilməsinin və daha da gücləndirilməsinin o vaxtdan bəri azərbaycanlılar üçün əsas məqsəd olduğunu vurğulayıb. Çıxışda dövlət müstəqilliyimizin Prezident İlham Əliyevin rəhbərliyi ilə həyata keçirilən milli maraqlara əsaslanan daxili və xarici siyasətin mərkəzində dayandığını bildirilib və Azərbaycanın müstəqil siyasətinə görə beynəlxalq aləmdə böyük hörmət qazandığını qeyd edilib.
Sonra Avstriyanın Avropa və Beynəlxalq İşlər Nazirliyinin siyasi direktoru Hanna Liko çıxış edərək, ölkələrimiz arasında münasibətlərin tarixinə nəzər salıb, Avstriyanın Cənubi Qafqaz regionunda ilk səfirliyinin məhz Azərbaycanda təsis edildiyini vurğulayıb. O, Azərbaycanla Avstriya arasında mövcud olan sıx iqtisadi münasibətlərə də toxunub, SOCAR-in Avstriyada və Avstriyanın Azərbaycanda fəaliyyət göstərən şirkətlərinin iqtisadi münasibətlərə verdiyi töhfələrdən bəhs edib. Səfir Liko ikitərəfli münasibətlərin dinamik şəkildə inkişaf etdiyini bildirib, bu xüsusda cari ilin iyul ayında xarici işlər nazirlikləri arasında ikitərəfli siyasi məsləhətləşmələrin keçiriləcəyini nəzərə çatdırıb. O, çıxışında Azərbaycan və Ermənistan arasında sülh proseslərini alqışlayıb və Avropa İttifaqının da bunu dəstəklədiyini qeyd edib. Hanna Liko çıxışın sonunda bağlantılar və enerji diversifikasiyası baxımından Avropa İttifaqı üçün Azərbaycanın çox vacib rol oynadığını diqqətə çatdırıb.
Rəsmi çıxışlardan sonra tədbir bədii hissə ilə davam etdirilib.
Bölmənin digər xəbərləri
