Akademiyanın gənc alimlərinin təklif və problemləri dinlənilib
Bakı, 11 aprel, AZƏRTAC
Azərbaycan Milli Elmlər Akademiyasının (AMEA) prezidenti vəzifəsini icra edən akademik Arif Həşimov akademiyanın elmi müəssisə və təşkilatlarının Gənc Alim və Mütəxəssislər şuralarının sədrləri ilə görüşüb.
Bu barədə AZƏRTAC-a AMEA-dan məlumat verilib.
Akademik Arif Həşimov AMEA-nın elmi bölmələrinin nümayəndələri ilə Azərbaycan elminin dayanıqlı inkişafının təmin edilməsi üçün qarşıda duran vəzifələrin müzakirəsi məqsədilə görüşlər keçirildiyini bildirib. Görüşlərdə səsləndirilən təkliflər əsasında Rəyasət Heyəti tərəfindən müvafiq qərarın qəbul edildiyini və artıq bu istiqamətdə müəyyən işlərin həyata keçirilməyə başlanıldığını diqqətə çatdırıb.
Arif Həşimov qeyd edib ki, Azərbaycanda elmi biliklərin qədim və zəngin ənənələri var: “Ölkəmiz SSRİ dövründə neft, qaz, kimya və digər sahələrdə aparılan tədqiqatların əsas elmi mərkəzlərindən biri olub və Azərbaycan elmində əldə olunan nailiyyətlər daim yüksək qiymətləndirilib”.
Akademikin sözlərinə görə, ötən müddət ərzində alimlərimiz tərəfindən Azərbaycanda bir çox elmi məktəblər yaradılıb və cəmiyyətimizin inkişafına töhfə verən kadrlar yetişdirilib. Hazırda da AMEA-nın güclü kadr potensialının olduğunu diqqətə çatdıran akademik Arif Həşimov perspektivli müasir gənclərin hesabına elmi məktəblərimizi, kadr potensialımızı qoruyub saxlamağın və inkişaf etdirməyin əhəmiyyətini vurğulayıb. Akademiyada tətbiqi xarakterli işlərin genişləndirilməsinə tələbat olduğunu deyib. Gələcəkdə aparılacaq tədqiqatların sənayenin, kənd təsərrüfatının, iqtisadiyyatın müxtəlif sahələrinə tətbiqinin zəruriliyini bildirib. Gəncləri bu istiqamətdə təşəbbüskarlığı ələ almağa, AMEA-da tətbiq işlərinin həyata keçirilməsində aktiv olmağa çağırıb.
AMEA-nın Gənc Alim və Mütəxəssislər Şurasının sədri kimya üzrə fəlsəfə doktoru Elmir Babayev gənclərin elmi, elmi-təşkilati fəaliyyətində mövcud problemlərini əks etdirən bir sıra məsələlərə toxunub. O, gənclərin elmə həvəsinin artırılması məqsədilə il ərzində elmi, elmi-təşkilati fəaliyyətində fərqlənən gənclərin stimullaşdırılması üçün AMEA-nın mükafatının yaradılmasını təklif edib. Qrant layihələrində iştirak kimi məsələlərin şuranın prioritet istiqamətlərindən biri olduğunu deyən Elmir Babayev bu gün AMEA-nın gənc alimlərinin Elmin İnkişafı Fondu, SOCAR-ın Elm Fondu və Azərbaycan Respublikasının Gənclər Fondunun qrant proqramlarında geniş iştirak etdiyini, lakin beynəlxalq qrantlarda işin qənaətbəxş səviyyədə olmamasını söyləyib. Onun sözlərinə görə, bu istiqamətdə problemlərin həlli üçün AMEA-nın Rəyasət Heyəti aparatının Elmi-təşkilat idarəsinin və Beynəlxalq elmi əməkdaşlıq şöbəsinin dəstəyi və təşkilatçılığı ilə gənclər üçün maarifləndirici seminarlar keçirilib.
O, həmçinin elmi konfranslar, simpoziumlar, təcrübə proqramları hesabına gənclərin beynəlxalq əlaqələrinin genişləndirilməsi, potensiallı gənclərin erkən dövrdə aşkar olunması, onların elmi, elmi-təşkilati qabiliyyətlərinin inkişaf etdirilməsi və sosial mühitin balanslaşdırılması üçün regionlarda elmin inkişafı və s. təkliflərini səsləndirib.
Akademiyanın elmi müəssisələrinin Gənc Alim və Mütəxəssislər şuralarının sədrləri çıxış edərək təkliflərini və problemlərini səsləndiriblər. Təkliflərdə müasir avadanlıqlardan istifadə etməklə özünümaliyyələşdirmə imkanlarının genişləndirilməsi, məktəblərdə, liseylərdə görüşlər keçirərək istedadlı kadrların elmə yönləndirilməsi yer alıb. Region məktəblərində seysmoloji maarifləndirmə işlərinin həyata keçirilməsi, yerli qrant verən təşkilatların sayının artırılması, doktoranturadan xarici dil imtahanına hazırlaşmaq üçün akademiyanın dəstəyi ilə ingilisdilli müəllimlərin cəlb edilməsi qeyd olunub. AMEA əməkdaşlarına Dövlət İmtahan Mərkəzinin doktorantura imtahanları üçün ödənişlərə köməyin göstərilməsi, ərəb və fars dillərinin doktorantura və dissertantura üzrə minimum imtahanlarına daxil edilməsi təklif olunub. Eyni zamanda, gənclərin təcrübə keçmək üçün xaricə göndərilməsi, epiqrafiya sahəsində kadrların yetişdirilməsi məsələləri diqqətə çatdırılıb.
AMEA-nın Rəyasət Heyəti aparatının Beynəlxalq elmi əməkdaşlıq şöbəsinin müdiri biologiya üzrə fəlsəfə doktoru Esmira Əlirzayeva qeyd edib ki, gənclərin xaricdə təcrübə keçmələri üçün bir çox proqramlar mövcuddur və hər ay onlar barədə məlumatlar AMEA-nın elmi müəssisə və təşkilatlarına göndərilir. Esmira Əlirzayeva hazırda mövcud proqramlar sırasında İslam İnkişaf Bankının (İİB) geniş imkanlar açdığını və AMEA-nın bir neçə gənc əməkdaşının İİB-nin maliyyə dəstəyi əsasında doktorantura, postdoktorantura təhsili aldığını söyləyib. O, həmçinin müvafiq dövlət orqanlarının rəyi əsasında xaricdə doktorantura təhsili almağa gedən gənclərin iş yerlərinin və əməkhaqlarının saxlanılacağını diqqətə çatdırıb.
Bundan əlavə, Avropa Komissiyasının Tədqiqat və İnnovasiya Proqramı olan “Horizon Avropa” barədə məlumat verən Esmira Əlirzayeva Azərbaycan alimlərinin tədqiqatlarına xaricdə geniş marağın olduğunu, beynəlxalq konsorsiuma daxil olmaqla alimlərimizin xarici həmkarları ilə birgə “Horizon Avropa” Proqramı çərçivəsində neft-qaz, yer elmləri, folklorşünaslıq, şərqşünaslıq və digər sahələrdə araşdırmalar apara biləcəklərini vurğulayıb, gəncləri rəhbərlik etdiyi şöbə ilə sıx əməkdaşlığa çağırıb.
AMEA Rəyasət Heyəti aparatının Elmi-təşkilat idarəsinin rəisi fizika üzrə fəlsəfə doktoru, dosent Rüstəm Rüstəmov qeyd olunan təkliflərin həyata keçirilməsi, avadanlıqlardan birgə istifadə və gənclərin müştərək tədqiqatlar aparması üçün AMEA-da Gənclərin İnnovativ Mərkəzinin və yaxud Gənclərin Mükəmməllik Mərkəzinin yaradılmasını təklif edib.
Akademik Arif Həşimov səsləndirilən təkliflərin ümumiləşdirilərək AMEA Rəyasət Heyətinə təqdim olunmasını tövsiyə edib.
Bölmənin digər xəbərləri
