Almaniyada meşələrlə bağlı qaydalar necədir?
Berlin, 7 aprel, AZƏRTAC
AZƏRTAC-ın martın 19-da dərc edilmiş materialında Almaniya meşələrində ocaq qalanması və cərimələrin məbləğindən söz açılmışdı. Bugünkü yazıda isə bu ölkədə meşələrlə bağlı qaydalardan bəhs ediləcək.
Azərbaycan üçün də aktual olan çır-çırpı məsələsindən başlayaq. Almaniyada buxarı və müxtəlif sobaların istifadə dairəsi genişlənir. Bölgələrdə və paytaxtda bir çox fərdi evlərin ayrılmaz atributu olmaqla yanaşı, buxarılara köhnə binalarda da xeyli sayda rast gəlinir. Adətən, almanlar çır-çırpını inşaat supermarketlərindən alırlar. Lakin son zamanlar səliqəli çır-çırpı bağlamaları şəhərlərdəki adi ərzaq mağazalarının qarşısında da qoyulur. Əlbəttə, meşədən toplanmış çır-çırpıdan da istifadə etmək olar, lakin onların yığılması üçün fərdi mülkiyyətçinin, yaxud dövlət meşəbəyisinin xüsusi icazəsi lazımdır. Bu icazə bir aydan bir ilədək verilə bilər, qiyməti isə bir kubmetr üçün orta hesabla 10-30 avrodur. Qaydaları pozanları 730 avroyadək cərimə, hətta yeddi günədək inzibati həbs cəzası gözləyir.
Almaniyanın bir çox federal torpaqlarında - Türingiya, Şlezviq-Holşteyn və Meklenburq Ön Pomeraniyada itləri yalnız xalta ilə gəzdirmək olar. Brandenburq və Hamburqda isə xaltanın qısa olması tələb olunur. Baden-Vürtemberq, Bavariya, Hessen, Reynland-Pfalts, Saar və Saksoniyada itləri xaltasız gəzdirməyə icazə verilsə də, onların sahibləri heyvanın uzağa qaçmamasına, nəzarət zonasında olaraq komandaları eşidə bilməsinə diqqət yetirməlidirlər.
Nəzəri olaraq, bu qaydaları pozanlar üçün maksimal cərimələrin məbləğı 50 min avrodur. Standart cərimələr 20-50 avro, xüsusi təhlükəli it cinslərinin sahibləri üçün isə 50 ilə 150 avro civarında dəyişir.
Meşədə velosiped sürmək və at belində gəzməyə yalnız bu məqsədlər üçün uyğun olan və xüsusi işarələnmiş cığırlarda icazə verilir. Bu cığırların hansının uyğun olması isə əbədi mübahisə mövzusudur. Velosipedçilərə cığırları tərk etmək qadağan edilib. Məsələn, Hessendə icazə verilməyən dağ enişlərindəki traslarda velosiped sürənlər min avroyadək cərimə edilə bilər.
Velosipedçilər üçün meşədə prioritetin piyadalara, habelə meşəbəyilərin və meşə təsərrüfatlarının nəqliyyat vasitələri və texnikasına aid olmasını yadda saxlamaq vacibdir. Meşə zolaqları və cığırlarında tənzimləyici işarələr olmadığı üçün sağlam məntiq və qarşılıqlı nəzakət qaydaları ilə hərəkət etmək lazım gəlir. Son samanlar meşə yamaclarına doğru sürətlə gedən və qorxmuş piyadaları ən yaxşı halda kənara çəkilməyə, hətta kolluq, arx və yol kənarına qaçmağa vadar edən dağ velosipedçilərinə qarşı çoxlu şikayətlər daxil olur.
Balıq tutmaq həvəskarlarına gəldikdə, Almaniyada bu hobbi ilə məşğul olmaq istəyənlər xüsusi balıqçı vəsiqəsi və rəsmi orqanlar, yaxud su hövzəsi sahibinin icazəsini almalıdırlar. Balıqçı vəsiqəsi almaq üçün xüsusi kurslar keçmək və imtahan vermək lazımdır. Bir sualın qiyməti 200 avroya yaxındır.
Bir çox federal torpaqlara - Bavariya, Berlin və Aşağı Saksoniyada bu sənədlər olmadan balıq tutmaq cinayət əməli sayılır və iki ilədək həbs, yaxud cərimə ilə cəzalandırılır. Özəl su hövzələrində icazəsiz balıq tutanları, yaxud onları sonradan satanları beş ilədək azadlıqdan məhrumetmə və ya cərimə cəzası gözləyir.
Müvafiq sənədlər olmadan balıq tutmağın inzibati xəta sayıldığı federal torpaqlarda cəzalar bu dərəcədə sərt deyil. Ən yüksək məbləğdə cərimələr göllərlə zəngin olan Maklenburq Ön Pomeraniya vilayətində (75 min avroyadək), ən az isə Hessen və Baden-Vürtemberqdədir (5 min avroyadək).
Alman meşələrində giləmeyvə, göbələk, qoz, ot və çiçəklər mühafizə altında deyilsə, onların az miqdarda və yalnız şəxsi ehtiyac məqsədilə toplanılmasına icazə verilir. Bu icazə meşə cığırlarını tərk etmək üçün izn verilən yerlərə aiddir. Qoruqlarda və təbiəti mühafizə zonalarında xüsusi qaydalar qüvvədədir. Bu yerlərdə bəzi istisnalarla yuxarıda qeyd olunan təbiət nemətlərinin heç birini toplamaq olmaz.
Göbələk toplamaq qaydalarına gəldikdə isə, hər bir şəxs bir-iki pay, maksimum gündə iki kiloqram toplaya bilər. Daha çox göbələk toplamaq, qonşuları da qonaq etmək istəyənlər əvvəlcədən xüsusi icazə almalı və ödəniş etməlidirlər. Normadan artıq toplanmış göbələklər müsadirə oluna bilər. Federal torpaqdan və digər şərtlərdən asılı olaraq xüsusi icazə olmadan ticarət məqsədi ilə göbələk toplanmasına görə bir neçə min avro cərimə nəzərdə tutulur. Bu qaydalar giləmeyvə yığılmasına da şamil olunur, yəni adambaşına bir kiçik banka toplamağa icazə verilir.
Çiçəkləri və digər bitkiləri toplayanlar onların bir kiçik buketdən böyük olmamaqla, bir əlin baş və işarə barmaqlarının arasında meydana gələn dairəyə sığan ölçüdə olmasına diqqət etməlidirlər. Bu qayda almanca “Handstraußregelung” adlanır.
Ekspertlər qanunla münaqişəyə girməmək və hər hansı qaydaları pozmamaq üçün vətəndaşlara təbiət nemətləri üçün meşəyə getməzdən əvvəl yerli meşə idarələri, yaxud şöbələrindən məsləhət almağı tövsiyə edirlər. Bununla belə, hər hansı konkret meşədə göbələk və giləmeyvələrin ayrı-ayrı növləri üçün daha səxavətli normaların olması da mümkündür.
Qoruqlar və digər mühafizə zonaları istisna olmaqla, alman meşələrində ümumi davranış qaydalarına riayət etmək şərti ilə piknik keçirmək olar. Əlbəttə, zibili özünlə aparmalısan. Əgər meşədə qalmış zibilin çəkisi iki kiloqramdan çoxdursa, cərimənin məbləği 500 avrodan artıq ola bilər. Meşəyə atılmış banan qabığı isə 80 avroya başa gəlir.
Almaniyada nəqliyyat vasitələrinin meşədə, yaxud meşə cığırlarında saxlanılması qadağandır. Bunun üçün xüsusi işarələnmiş parklama yerləri nəzərdə tutulur.
AZƏRTAC növbəti dəfə çadırlarda və yataq kisələrində gecələmək qaydalarından bəhs edəcək.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
