AMEA-nın magistraturasını bitirən tələbələrin “Məzun günü” keçirilib
Bakı, 7 iyul, AZƏRTAC
İyulun 7-də AMEA-nın magistraturasını bitirən tələbələrin “Məzun günü” keçirilib.
AZƏRTAC xəbər verir ki, tədbirdə çıxış edən AMEA-nın prezidenti akademik İsa Həbibbəyli Azərbaycan Milli Elmlər Akademiyasında magistratura təhsilinin ölkə başçısının Fərmanı ilə 2015-ci ildə yaradıldığını xatırladıb. Diqqətə çatdırıb ki, bu günədək akademiya üçün ümumilikdə 749 plan yerinin ayrılıb və həmin yerlərə 649 nəfər qəbul olub. Ötən illər ərzində akademiyada gəncləşmə siyasətinin həyata keçirilməsində magistraturanın böyük rolu olub.
İsa Həbibbəyli akademiyanın magistraturasında yalnız AMEA üçün deyil, bütün ölkə üçün kadrlar hazırlandığını vurğulayıb. O, həmçinin AMEA-nın Gənc Alim və Mütəxəssislər Şurası tərəfindən hazırlanan “Gənc tədqiqatçı” elmi jurnalının bu ildən il ərzində 4 dəfə çap olunacağını, onlardan 1 nömrənin isə ingilis dilində nəşr ediləcəyini bildirib.
Əsası Ulu Öndər Heydər Əliyev tərəfindən qoyulmuş və Prezident İlham Əliyev tərəfindən uğurla inkişaf etdirilən gənclər siyasətinə uyğun çoxsaylı tədbirlərin AMEA-da da geniş şəkildə həyata keçirildiyini bildirən akademik İsa Həbibbəyli məzunları təbrik edərək onlara gələcək fəaliyyətlərində uğurlar arzulayıb.
Daha sonra “Elm məbədi” filmi nümayiş etdirilib.
Tədbirdə çıxış edən AMEA Rəyasət Heyəti aparatının Elm və təhsil şöbəsinin müdiri texniki elmləri üzrə fəlsəfə doktoru, dosent Hüseyn Hüseynov akademiyadan bu günədək ümumilikdə 479 nəfərin məzun olduğunu, onlardan 45 faizinin, yəni 216 nəfərin AMEA-da qalaraq öz elmi fəaliyyətlərini davam etdirdiklərini söyləyib. 2015-2023-cü illərdə məzunların bölmələr üzrə statistikasını təqdim edən H.Hüseynov 176 nəfərin Fizika-Riyaziyyat və Texnika Elmləri Bölməsindən, 115 nəfərin Biologiya və Tibb Elmləri Bölməsindən, 81 nəfərin Kimya Elmləri Bölməsindən, 51 nəfərin Yer Elmləri Bölməsindən, 30 nəfərin İctimai Elmlər Bölməsindən, 26 nəfərin isə Humanitar Elmlər Bölməsindən məzun olduğunu diqqətə çatdırıb.
Məruzəçi 2023-cü il üzrə 102 məzundan 74-nün fərqlənmə diplomuna layiq görüldüyünü, AMEA-nın Humanitar və İctimai Elmlər bölmələri üzrə 15 məzundan 6-nın təhsilini davam etdirmək üçün akademiyanın doktoranturasına sənədlərini təqdim etdiyini söyləyib: “2015-2023-cü illərdə AMEA-nın magistraturasından məzun olan 479 magistrdən 103 nəfəri hazırda fəlsəfə doktoru hazırlığı üzrə təhsilini davam etdirir. Üç nəfər dissertasiya müdafiə edərək fəlsəfə doktoru elmi dərəcəsinə yiyələnib, onlardan biri isə artıq elmlər doktoru hazırlığı üzrə təhsilini davam etdirir. Habelə 14 məzun təhsilini xaricdə davam etdirir”.
Milli Məclisin Gənclər və idman komitəsinin sədr müavini Şahin İsmayılov isə bildirib ki, bu gün qloballaşan dünyada milli kimliyimizin qorunmasında və milli dəyərlərimizin təbliğində gənc alimlərin üzərinə böyük məsuliyyət düşür. Respublikada gənclərə daim xüsusi diqqət yetirilib, Ulu Öndər hakimiyyətə qayıtdıqdan sonra ölkəmizdə Gənclər və İdman Nazirliyi yaradılıb, Gənclər Günü təsis edilib, gənclərin forumları keçirilib və bu siyasət Prezident İlham Əliyev tərəfindən uğurla davam etdirilir.
Tədbirdə AMEA-nın vitse-prezidenti vəzifəsini icra edən akademik Gövhər Baxşəliyeva və akademik Ə.Quliyev adına Aşqarlar Kimyası İnstitutunun baş direktoru akademik Vaqif Fərzəliyev çıxış edərək gənclərə öz tövsiyələrini çatdırıblar.
Nizami Gəncəvi adına Ədəbiyyat İnstitutunun məzunu Nəzrin Əliyeva, A.A.Bakıxanov adına Tarix İnstitutunun məzunu Fatimə Rüstəmova, Riyaziyyat və Mexanika İnstitutunun məzunu İlkin Feyzullayev və valideynlərdən Təranə Cəfərova isə çıxışlarında akademiya rəhbərliyinə və müəllimlərinə təhsil aldıqları müddətdə yaradılan şəraitə və göstərilən dəstəyə görə minnətdarlıqlarını bildiriblər.
Çıxışlardan sonra AMEA-nın Marşı səsləndirilib.
Bölmənin digər xəbərləri
