AMERİKA İLLÜZİONİSTİ DEVİD BLEYN DÜNYA REKORDU MÜƏYYƏN ETMİŞDİR
AZƏRTAC xəbər verir ki, tanınmış amerikalı illüziyaçı Devid Bleyn nəfəsini 17 dəqiqə 4 saniyə saxlayaraq, yeni dünya rekordu qazanmışdır. İnsan orqanizminin tükənməz imkanlarının növbəti uğurlu sınağı aprelin 30-da Opra Uinfrinin teleşousunun birbaşa efirində baş tutmuş və bütün Birləşmiş Ştatlara yayımlanmışdır.
İllüzionist bildirmişdir ki, bu rekord onun “ən böyük arzusu idi”.
Qabaqcadan qoyulmuş şərtə görə, Bleyn diametri təqribən 2,5 metr olan və su ilə doldurulmuş kürəyə girmişdir. İllüzionist tam sükunətdə olmağa, hətta ürək döyüntüsünü yavaşıtmağa çalışırdı ki, orqanizmin oksigenə tələbatını minimuma endirsin. Ginnes Rekordlar kitabının nümayəndələri illüzionistə eksperimentdən əvvəl ağçiyəri doyuzdurmaq və bədəndən karbon qazını çıxarmaq məqsədi ilə təqribən 30 dəqiqə təmiz oksigenlə nəfəs almağa icazə vermişdilər.
Həmin sahədə əvvəlki rekord isveçrəli Piter Kolata məxsus idi. Bu il fevralın 10-da o, nəfəsini 16 dəqiqə 32 saniyə saxlamışdı.
Bölmənin digər xəbərləri
