Budapeşt, 20 oktyabr, AZƏRTAC

“Oktyabrın 15-də Azərbaycan xalqı Prezident İlham Əliyevin dövlət başçısı vəzifəsinə seçilməsinin iyirmi illiyini qeyd etdi. 2003-cü ildən bəri İlham Əliyev sadəcə Azərbaycanın lideri olmadı, həm də həqiqətən Avrasiyanın ən uğurlu dövlət xadiminə çevrilə bildi”.

Bu fikirləri AZƏRTAC-ın müxbirinə amerikalı politoloq Peter Teys bildirib.

“O, əzmkarlığın və mərdliyin təcəssümü oldu, o, öz vədinə əməl edən adamdır və Avropanın şərq cinahlarında sabitliyi və iqtisadi inkişafı təmin etmək iqtidarındadır”, - deyə politoloq vurğulayıb.

"Prezident İlham Əliyev dünya siyasətçiləri arasında öz layiqli yerini tutaraq, dayanıqlı milli iqtisadi model yarada bilib, peşəkar və yüksək səviyyədə təchiz olunmuş silahlı qüvvələrə rəhbərlik edib. Ali Baş Komandanın rəhbərlik etdiyi Azərbaycan Silahlı Qüvvələri ölkənin suveren ərazisinin hər qarışını azad edib və otuz illik erməni işğalına son qoyub", - P.Teys bildirib.

Politoloq, bununla yanaşı, Bayden administrasiyasının ABŞ-ın Vaşinqton və Kaliforniyada fəal erməni dairələrinə diqqət yetirməsindən təəssüfləndiyini də bildirib. “Ağ ev Ermənistanın şovinist rejiminin hərəkətlərini açıq şəkildə dəstəkləyərək, bununla beynəlxalq humanitar qanunların tamamilə pozulduğunu nümayiş etdirmiş olur. Erməni terrorçularının Azərbaycanın suveren ərazisində törətdiyi əməllər HƏMAS və onun arxasında duran qüvvələrin İsrail dövlətinə qarşı törətdiyi hazırkı terror aktlarından daha betərdir”,- politoloq qeyd edib.

O, ABŞ Dövlət katibi Antoni Blinkenin guya Amerika konqresmenlərini “Azərbaycanın yaxın günlərdə Ermənistana mifik şəkildə hücum edəcəyi ilə bağlı” xəbərdar etməsinə dair “Politico” internet nəşrində dərc edilən iddialara da münasibət bildirib. Politoloq deyib ki, "Politico" nəşrinin erməni rejiminə dəstək məqsədilə dərc etdiyi yazı erməni ictimai dairələrinin Azərbaycan hökuməti əleyhinə yalan məlumat yaymaq və qarayaxma kampaniyasını genişləndirmək üçün növbəti uğursuz cəhdidir.

O xatırladıb ki, Azərbaycan Prezidenti dəfələrlə ölkəsinin hökumətinin ciddi beynəlxalq oyunçu olduğunu və beynəlxalq təhlükəsizlik məsələlərinə məsuliyyətlə yanaşdığını bəyan edib. “Bakının yeganə məqsədi öz suveren ərazisində tam nəzarətin bərqərar olunmasıdır - bundan başqa heç nə”, - deyə Teys qeyd edib və əlavə edib ki, görünür Ermənistanın “çirkli pul” taktikası Avropa Parlamenti, Avropa Şurası, eləcə də ABŞ Konqresinin dəhlizlərində uğurla işləyir.

P.Teysin sözlərinə görə, Azərbaycan Respublikasının öz suveren ərazisinə tam nəzarət etməsi və Cənubi Qafqaz regionunda sülhün və iqtisadi rifahın təmin edilməsi bütün dünyanın marağındadır:

“Bayden-Harris administrasiyası, əslində, Avropa Parlamenti kimi, Azərbaycanın Prezident İlham Əliyevin rəhbərliyi ilə son on ildə əldə etdiyi geosiyasi nailiyyətləri diqqətlə öyrənməlidir. Həm Vaşinqton, həm də Brüssel Bakıya qarşı siyasi riyakarlıqdan çəkinməli, Aİ isə dərhal Azərbaycan Hökuməti ilə daha sıx əlaqələr qurmalı və Azərbaycanın demokratik hökumətinə edilən hücumlar zamanı istifadə olunan ritorikaya son qoymalıdır”.

“ABŞ-ın keçmiş prezidentlərindən biri Uliss S. Qrant bizə vətənpərvərlik anlayışının mahiyyətini unutmamaq, həmçinin cəhalət təhlükəsini anlamaq üçün dəyərli vəsiyyət qoyub: “Əgər yaxın gələcəkdə milli varlığımız uğrunda daha bir yarışma keçirəcəyiksə, o zaman ayırıcı xəttin Meyson və Dikson xətti ilə deyil, bir tərəfdən vətənpərvərlik və zəka ilə digər tərəfdən xurafat, lovğalıq və cəhalət arasında keçəcəyini proqnozlaşdırıram”, - deyə Teys bildirib.

"Qorxuram ki, həm Vaşinqton, həm də Brüssel bu gün cəhalətin və İrəvanın və onun xarici havadarları tərəfindən mənasız pul ilə ələ alma ilə birlikdə qafil, maskalanmış siyasi ambisiyaların dəhşətli nəticələri ilə üzləşirlər. Söhbət Azərbaycan Respublikası ilə strateji tərəfdaşlığın bərqərar olunması və Cənubi Qafqazda sülhün və geosiyasi sabitliyin, tarazlığın qorunmasına köməklik edilməsi barədə gedəndə Vaşinqton və Avropa İttifaqında mənəvi aydınlıq çatışmazlığı müşahidə olunur”, - deyə Peter Teys əlavə edib.

Vüqar Seyidov

AZƏRTAC-ın xüsusi müxbiri

Budapeşt