Ann Buşer: Azərbaycanla əməkdaşlıqda maraqlıyıq
Brüssel, 30 mart, AZƏRTAC
Azərbaycan Qida Təhlükəsizliyi Agentliyinin nümayəndə heyəti ilə görüşümüzdən şad oldum. Bu, vacib görüş idi, çünki qida təhlükəsizliyi məsələləri ilə bağlı ilk görüşümüzdən 7 il ötüb. Ölkədə yeni sistem yaradılıb. Bu, yaxşı başlanğıcdır və AQTA ilə əməkdaşlığımız üçün yeni bir səhifə açır.
Bu fikirləri Avropa Komissiyasının Sağlamlıq və Qida Təhlükəsizliyi Baş Direktorluğunun rəhbəri Ann Buşer AZƏRTAC-a müsahibəsində söyləyib.
Bildirib ki, qida təhlükəsizliyi agentliklərinin fəaliyyəti insanların sağlamlığını təmin etmək baxımından çox vacibdir.
“Avropa İttifaqında qida standartları çox yüksəkdir. Qida idxal edəndə Avropa İttifaqı standartlarına uyğunluğu gözləyirik. Buna görə Avropa İttifaqı qida təhlükəsizliyi agentliyi Azərbaycana lazımi dəstəyi verməyə hazırdır. Azərbaycan istehsalçıları bizə daha yaxın olacaq və bununla da Azərbaycan qida məhsullarına etibarlılıq yaranacaq. Azərbaycandan gələn qidaların Avropa vətəndaşları üçün təhlükəsiz olduğuna əmin ola biləcəyik. Bu inkişaf bizi çox sevindirir”, - deyə A.Buşer bildirib.
Qeyd edib ki, Avropa Komissiyasının Sağlamlıq və Qida Təhlükəsizliyi Baş Direktorluğu ölkəmizlə əməkdaşlığı davam etdirməkdə maraqlıdır. “Azərbaycanla əməkdaşlıqda maraqlıyıq. Avropa İttifaqı ilə ticarət müqaviləsi imzalamaq üçün ikitərəfli şərtlər müzakirə olunacaq. Yerli məhsulun Avropa standartlarına uyğunluğu, ekspertlərin hazırlanması istiqamətlərində müzakirələr aparılıb,” - deyə Ann Buşer bildirib.
Şəhla Ağalarova
AZƏRTAC-ın xüsusi müxbiri
Brüssel
Bölmənin digər xəbərləri
