Aqrar Fəaliyyətli Azərbaycan Qadınları layihəsinə başlanılıb
Bakı, 7 may, AZƏRTAC
Mayın 7-də Dövlət Aqrar Ticarət Şirkəti BMT-nin Ərzaq və Kənd Təsərrüfatı Təşkilatı (FAO) ilə birgə Aqrar Fəaliyyətli Azərbaycan Qadınları (AFAQ) layihəsinə başlayıb.
AZƏRTAC xəbər verir ki, FAO-nun Azərbaycandakı ofisinin rəhbəri Mələk Çakmak Dövlət Aqrar Ticarət Şirkəti ilə təmsil etdiyi qurumun aqrar sahədə qadınların məşğulluğunun, onların informasiya, resurs və bazarlara çıxış imkanlarının artırılması, bununla da qadınların sosial-iqtisadi rifahının yaxşılaşdırılması məqsədilə AFAQ layihəsini həyata keçirəcəyini deyib. Bildirib ki, layihənin məqsədi qadınlar tərəfindən istehsal olunan məhsulların satış bazarlarına çıxışının asanlaşdırılması, kənd təsərrüfatı sahəsində öz biznesini quracaq qadın sahibkarların formalaşdırılması, onların marketinq və satış sahəsində biliklərinin artırılması, qadınlar üçün kiçik istehsal müəssisələri və istixanaların yaradılmasıdır. AFAQ layihəsi FAO ilə Azərbaycan hökuməti arasında imzalanmış Tərəfdaşlıq Proqramı çərçivəsində icra olunacaq.
"Bu gün qadın fermerlər kənd təsərrüfatındakı məşğulluğun təxminən 50 faizini təşkil edir. Ancaq qadın fermerlərin bilik və informasiyalara çıxışı azdır və bu, cəmi 2 faiz təşkil edir. Bu layihənin məqsədi qadın fermerlərin gördükləri işlərin daha da yaxşılaşdırılması, onların bacarıqları və biliklərinin artırılması, eyni zamanda, istehsal resurslarına, xüsusilə də maliyyə bilik və bacarıqlarına çıxışı yolu ilə onların bazara çıxışını təmin etməkdir. Layihə çərçivəsində onlara gəlirlərini artırmaq yolunda işlər görmək istəyirik”, - deyə M.Çakmaz qeyd edib.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ölkəmizdə qadın sahibkarlığının inkişafına göstərilən diqqət və qayğıdan danışıb. Deyib ki, bu gün təqdim olunan AFAQ layihəsi qadınlar üçün mühüm əhəmiyyət daşıyır: “Bu layihə qadınların kənd təsərrüfatında fəaliyyətlərini stimullaşdıracaq. Qadınların məşğulluğu onların ailələrinin rifahının yaxşılaşdırılmasında mühüm rol oynayır. Bizim əsas hədəflərimizdən biri qadınların kənd iqtisadiyyatında fəallığını təmin etməkdir. Əhalinin dörddə birini təşkil edən kənd qadınlarının sosial və iqtisadi həyatda iştirakına xüsusi önəm verilir. Yaradılmış imkanlar, sosial infrastrukturun inkişafı, yeni texno və sənaye parklarının fəaliyyəti qadınlar üçün stimuldur. Kiçik və orta sahibkarlıq fəaliyyətinə başlayan qadınlar üçün müəyyən mexanizmlər hazırlanmalıdır, belə ki, peşə hazırlığı kurslarına cəlb olunmalı, bazar iqtisadiyyatı ilə sahibkarlıq fəaliyyəti haqqında bilik və təcrübə qazanmaları üçün maarifləndirici tədbirlər keçirilməlidir. Hazırda respublikada yaradılan qadın resurs mərkəzlərinin fəaliyyəti buna misaldır”.
Bu gün ölkəmizdə qadınların əməyinin olduqca yüksək olduğunu deyən kənd təsərrüfatı nazirinin müavini İlhamə Qədimova bildirib ki, qadınların digər sahələrdə olduğu kimi, istehsal, sənaye və kənd təsərrüfatı sahələrində əməyi az deyil: “Xüsusilə də kənd təsərrüfatı sahəsində onların əməyi olduqca böyük və əvəzedilməzdir. AFAQ layihəsində iştirak edəcək aqrar fəaliyyətli qadınlar marketinq, logistika və anbar dəstəyi ilə də təmin olunacaqlar. Onların informasiya, istehsal və maliyyə resurslarına çıxış imkanları artacaq, onların iqtisadi və sosial fəallığının artırılması ilə kənd təsərrüfatı sahəsində gender bərabərliyinin təmin edilməsinə, qadınların kənd təsərrüfatı və emal məhsullarının istehsalı sahəsində bilik və bacarıqlarının artırılmasına nail olunacaq”.
Dövlət Aqrar Ticarət Şirkətinin direktoru Leyla Məmmədova isə diqqətə çatdırıb ki, 2 il müddətində davam edəcək layihə çərçivəsində qadın fermerlər üçün biznesin planlaşdırılması/biznesin inkişafı, liderlik, idarəetmə, marketinq, maliyyə savadlılığı və kənd təsərrüfatı ilə bağlı bacarıqların artırılması məqsədilə təlimlər keçiriləcək.
"Qadın fermerlərin aktiv şəkildə öz təcrübələrini bir-biri ilə bölüşməsi və əlaqə yaratmaları üçün onların vahid bir platformada birləşdirilməsi və həmin platforma üzərindən əməkdaşlıqların qurulması nəzərdə tutulur. Layihə zamanı kollektiv istehsal prosesləri üçün pilot fəaliyyətlərin həyata keçirilməsi məqsədilə kiçik istehsal müəssisələri və istixanalar yaradılacaq, davamlı təlimlər və texniki dəstəklə layihə inkişaf etdiriləcək. Dövlət Aqrar İnkişaf Mərkəzləri (DAİM), yerli icra orqanları, yerli QHT-lər və fermer assosiasiyaları layihəyə cəlb olunaraq informasiya-məsləhət xidmətləri və təlim vermə bacarıqları ilə təmin ediləcək", - deyə o bildirib.
FAO-Azərbaycan Tərəfdaşlıq Proqramın əsas məqsədi Dayanıqlı İnkişaf Məqsədləri (DİM) və FAO-nun strateji məqsədlərinə müvafiq olaraq ev təsərrüfatlarının ərzaq təhlükəsizliyinə, kənd yerlərində dolanışıq səviyyəsinin yaxşılaşdırılmasına və yoxsulluğun azaldılmasına töhfə verməkdir.
Bölmənin digər xəbərləri
