Ötən il qlobal mayeləşdirmə və yenidən qazlaşdırma gücü artıb - HESABAT
Bakı, 10 iyun, AZƏRTAC
Qlobal miqyasda mayeləşdirmə və yenidən qazlaşdırma gücü 2025-ci ildə də artmağa davam edib.
AZƏRTAC xəbər verir ki, bu barədə Beynəlxalq LNG İdxalçıları Assosiasiyasının (GIIGNL) illik hesabatında deyilir.
Hesabata görə, keçən il qlobal miqyasda mayeləşdirmə gücü 3 yeni qurğu və bir tutum artımı ilə ümumilikdə 524 milyon tona çatıb. Yenidən qazlaşdırma gücü isə 9 yeni terminalın istismara verilməsi ilə 1,247 milyard tona yüksəlib. Yeni terminallar, tutum artımları, istismara verilən qurğular Asiya, Avropa və Yaxın Şərqdə bazar artımını dəstəkləyib.
Bildirilir ki, ötən il mayeləşdirilmiş təbii qaz (LNG) gəmiqayırma sənayesində 2024-cü ildəki 67 gəmi ilə çatdırılma göstəricisini üstələyərək orta daşıma tutumu 175 min 586 kubmetr olan 79 yeni LNG daşıyıcısı işə salınıb. Qlobal donanma LNG tankerlərinin sayı ötən il 899-a çatıb ki, bu da əvvəlki illə müqayisədə 8,8 faiz artım deməkdir.
Bundan əlavə, donanmanın LNG daşıma tutumu ötən ilin sonuna qədər 136 milyon kubmetrə, aktiv donanmanın tutumu isə 131 milyon kubmetrə çatıb. Qlobal LNG donanmasına 54 FSRU gəmisi də daxil olmaqla, 30 min kubmetr tutumlu 82 gəmi daxildir.
Bölmənin digər xəbərləri
