ARDNŞ-İN TƏQAÜD PROQRAMININ İŞTİRAKÇISI ŞİRKƏTDƏ İŞLƏ TƏMİN EDİLMİŞDİR
AZƏRTAC xəbər verir ki, 2007-2008-ci illərdə Azərbaycan Respublikası Dövlət Neft Şirkətinin (ARDNŞ) Təqaüd Proqramı çərçivəsində ABŞ-ın Kolumbiya Universitetində beynəlxalq enerji idarəçiliyi və siyasəti ixtisası üzrə magistr təhsili almış Rövşən Nəcəf Azərbaycana qayıtmışdır.
İkiillik təhsil proqramını 1 il ərzində əla qiymətlərlə başa vurmuş Rövşən Nəcəf təhsil aldığı müddətdə ARDNŞ üçün son dərəcə aktual olan beynəlxalq neft bazarları, neft məhsulları, eləcə də neft-qaz ticarəti, birja əməliyyatları, beynəlxalq enerji layihələrinin hazırlanması və maliyyələşdirilməsi mövzularını əhatə edən fənlər üzrə biliklərini təkmilləşdirmişdir.
ARDNŞ prezidenti Rövnəq Abdullayev R. Nəcəflə görüşərək ölkə başçısı İlham Əliyevin müvafiq Sərəncamı ilə təsdiq olunmuş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın əhəmiyyəti barədə danışmış, Azərbaycanın qoşulduğu qlobal layihələrin həyata keçirilməsində savadlı kadrlara ehtiyac yarandığını, dövlətimizin yüksək təhsilli gənclərə arxalandığını qeyd etmişdir. ARDNŞ prezidenti Amerikada təhsil alan azərbaycanlı tələbələrin sosial-məişət problemləri, təhsilləri ilə maraqlanmışdır. Rövnəq Abdullayev R.Nəcəfin Dövlət Neft Şirkətinin Sərmayələr İdarəsinə işə götürülməsi barədə göstəriş vermişdir.
Bölmənin digər xəbərləri
