SİYASƏT
AŞPA-NIN PAYIZ SESSİYASI ÖZ İŞİNƏ BAŞLAMIŞDIR
Strasburq, 28 sentyabr (AZƏRTAC). Milli Məclisin Avropa Şurası Parlament Assambleyasındakı (AŞPA) Azərbaycan deputat qrupu qurumun sentyabrın 28-dən oktyabrın 2-dək davam edəcək payız sessiyasında iştirak etmək üçün Strasburqa gəlmişdir.
Sentyabrın 28-də sessiya başlamazdan əvvəl keçirilmiş büro iclasında, komitə və qrupların yığıncaqlarında deputatlarımız müzakirə olunmuş məsələlərlə əlaqədar ölkəmizin mövqeyini bildirmişlər.
Günün birinci yarısında öz işinə başlamış sessiyada AŞPA sədri Luis Maria de Puç rəhbərlik etdiyi təşkilatın gördüyü işlər baradə deputatlara məlumat vermişdir. O bildirmişdir ki, iqtisadi böhran, iqlim dəyişikliyi yaşadığımız dünyanın ən qlobal məsələləridir. Kinsburqda keçirilmiş 20-lərin sammitinin əsas mövzusu məhz bu problemləri əhatə etmişdir.
Rusiya-Gürcüstan münasibətlərinə toxunan sədr demokratiya və insan hüquqlarının Avropa Şurasının əsas prioritetləri olduğunu xatırlatmış, insan haqlarına dair protokolun 14-cü bəndinin Rusiya Duması tərəfindən ratifikasiya edilməsinin iki ölkə arasında münasibətlərin yaxşılaşacağına ümid verdiyini qeyd etmişdir.
Ətraf mühit və insan amilindən bəhs edən Luis Maria de Puç bildirmişdir ki, bu məsələlər həyat tərzinin mühüm problemləri olaraq qalmaqdadır. Dünyada elə ölkələr vardır ki, onlar yoxsulluğun son həddində yaşayır. Bu ölkələrdə əhalinin çoxu evsizlik şəraitində yaşayır, doyunca yeməyə möhtacdırlar. Aclıq planetimiz üçün ən qorxulu problem olaraq qalmaqdadır. Avropa Şurası bu problemlə bağlı narahatlıq keçirir, üzv ölkələr bu çətinliyin aradan qaldırılmasına səy göstərməlidirlər.
Avropa Şurası baş katibinin seçkisindən danışan sədr xatırlatmışdır ki, elə katib seçmək lazımdır ki, o, bir şəxisiyyət kimi Avropa Şurasının tələblərinə tamamilə cavab vermiş olsun. Bu məsələdə AŞPA ilə Nazirlər Komitəsi arasında razılığın əldə edilməməsi qurumun nüfuzuna ciddi xələl gətirir. Məsələnin dəfələrlə müzakirə edilməsinə baxmayaraq, hələ də ümumi razılıq əldə edilməmişdir. AŞPA bu məsələ ilə bağlı təkliflərlə çıxış etsə də, Nazirlər Komitəsi buna münasibət bildirməmişdir.
Sonda sədr Türkiyə-Ermənistan arasında əlaqələrin normallaşması istiqamətində addımların atılmasının, Sloveniya ilə Xorvatiya arasında ərazi iddiaları məsələsində ümimi razılıq əldə edilməsinin sevindirici hal olduğunu diqqətə çatdırmışdır.
Baş katib seçkisinin gündəliyə daxil edilməsi qızğın müzakirələrə səbəb olmuşdur. Kiprli deputat Xristos Purqudrisin məsələnin gündəlikdən çıxarılması təklifi birmənalı qarşılanmamış və bəzi deputatlar bu təklifə qarşı çıxış etmişlər. Məsələ səsə qoyularkən kiprli deputatın təklifi keçməmiş və məsələ gündəliyə daxil edilmişdir.
Deputatlar “Rusiya-Gürcüstan müharibəsi: bir il sonra”, mədəni təhsil, iqlim dəyişikliyi, İqtisadi İnkişaf və Əməkdaşlıq Təşkilatının fəaliyyəti, Şimalı Qafqazda insan hüquqları müdafiəçilərinin vəziyyəti, Birləşmiş Millətlər Təşkilatının islahatı və Avropa Şurasına üzv dövlətlər, 60 illik fonunda Avropa Şurasının gələcəyi, Monakonun qurum qarşısında götürdüyü öhdəliklərin yerinə yetirilməsinin vəziyyəti, Moldovada demokratik təsisatların fəaliyyəti, Aralıq dənizi üçün strateji qiymət, qadınlara qarşı zorakılıq, əhali və inkişafa dair Beynəlxalq Konfransın fəaliyyət proqramından on beş il keçdikdən sonrakı vəziyyət və digər məsələləri müzakirə etməyi qərara almışlar. Azərbaycanla bağlı hər hansı məsələ gündəliyə salınmamışdır.
Sessiyada Nazirlər Komitəsi sədrinin hesabatı da dinləniləcəkdir.
Sloveniyanın Prezidenti Danilo Türk, Fransanın Avropa Məsələləri üzrə dövlət katibi Pyer Leluş və bir çox beynəlxalq təşkilatların rəhbərləri deputatlar qaşısında çıxış edəcəklər.
Əsgər Əliyev
AZƏRTAC-ın xüsusi müxbiri
Strasburq