BMU-da tələbə və məzunlar üçün karyera festivalı keçirilib
Xırdalan, 22 may, AZƏRTAC
Bakı Mühəndislik Universitetində (BMU) “CareerFest BEU 2024” adlı karyera festivalı təşkil olunub.
BMU-dan AZƏRTAC-a bildirilib ki, Azərbaycanın bütün ali təhsil ocaqlarının tələbə və məzunları üçün açıq olan festivalda 104 nüfuzlu şirkət tərəfindən 1000-dən artıq aktiv vakansiya və təcrübə proqramları təqdim edilib. Tədbirdə Dövlət Məşğulluq Agentliyinin, Təhsilin İnkişafı Fondunun, Təhsil Tələbə Krediti Fondunun və digər qurumların rəhbər şəxsləri iştirak ediblər. Tədbirdən əvvəl qonaqlar universitetin binasında Heydər Əliyevin büstünün qarşısına gül dəstələri qoyaraq, Ulu Öndərin unudulmaz xatirəsinə dərin hörmət və ehtiramlarını ifadə ediblər.
Festivalın açılışında çıxış edən BMU-nun rektoru Yaqub Piriyev dövlətin gənclərin məşğulluğunun təminatı istiqamətində həyata keçirdiyi mühüm tədbirlərə diqqət çəkib və Prezident İlham Əliyev tərəfindən bu məqsədlə təsdiq olunmuş dövlət proqramlarının uğurla gerçəkləşdirildiyini bildirib. Karyera festivalının tələbə və məzunlar üçün önəmini vurğulayan rektor belə tədbirlərin həm mövcud əmək bazarındakı tələbat barədə məlumat əldə etmək, həm də iş, təcrübə imkanları, müxtəlif şirkətlərin insan resursları üzrə mütəxəssisləri ilə birbaşa ünsiyyət qurmaq baxımından mühüm rol oynadığını söyləyib. Rektor BMU-nun Müəssisələrlə əlaqələr və karyera departamentinin xətti ilə məzunların öz ixtisasları üzrə uğurlu karyera qurmaları üçün görülən işlərdən, o cümlədən planlaşdırılan yeniliklərdən, universitetdə tədris olunan ixtisaslardan bəhs edib, müvafiq statistik göstəricilərə toxunub. Ölkəmizdə fəaliyyət göstərən dövlət və özəl müəssisələri ilə BMU-nun sıx əməkdaşlığının qurulduğunu deyən Yaqub Piriyev tələbə və məzunlar, eyni zamanda, işəgötürənlər üçün faydalı olan karyera tədbirlərinin davam etdiriləcəyini söyləyib. Açıq hava şəraitində keçirilən, böyük maraq doğuran “CareerFest BEU 2024”ün ənənəvi əmək yarmarkalarından öz xüsusiyyətləri ilə fərqləndiyini qeyd edən rektor festivalın təşkili zamanı müasir gəncliyin öyrənmə maraqlarının nəzərə alındığını bildirib və gəncləri festivalın yaratdığı fürsətlərdən istifadə etməyə səsləyib.
Karyera festivalının işinə uğurlar arzulayan və belə bir tədbirin təşkili üçün təşəkkürünü bildirən Dövlət Məşğulluq Agentliyinin İdarə Heyətinin sədri Mustafa Abbasbəyli təmsil etdiyi qurumun il ərzində əhalinin məşğulluğunun təmin edilməsi istiqamətində gördüyü çoxşaxəli tədbirlər barədə məlumat verib. Bu gün əmək bazarında çox ciddi transformasiyaların baş verdiyini, yanaşmaların dəyişdiyini deyən Mustafa Abbasbəyli tələbə və məzunlara bu dəyişikliklərə uyğunlaşmaqla bağlı tövsiyələrini çatdırıb. Bu baxımdan universitetlərdəki karyera mərkəzlərinin fəaliyyətinin strateji əhəmiyyətini önə çəkən İdarə Heyətinin sədri bu mərkəzlərin inkişafı, tələbə və məzunlarla daha ciddi iş aparılması üçün Dövlət Məşğulluq Agentliyinin standartlar formalaşdırdığını və artıq bir çox universitetlərdə bunun tətbiq olunduğunu qeyd edib. Mustafa Abbasbəyli çıxışında universitet məzunlarının əmək bazarındakı fəaliyyəti ilə əlaqədar görülən digər işlərdən, məşğulluq reytinqi platformasının yaradılmasından danışıb. Bu platformanın verdiyi üstünlüklərdən, çox geniş təhlil imkanlarından yararlanmağın vacibliyini söyləyən Agentlik rəhbəri əmək bazarının çağırışlarına hazır olmaq üçün tələbə və məzunların üzərinə düşən vəzifələri nəzərə çatdırıb.
Təhsilin İnkişafı Fondunun İdarə Heyətinin sədri Elnur Nəsibov təhsil müəssisəsinin uğurunun əsas göstəricilərindən birinin əmək bazarında onun məzunlarına olan tələbatlılıq səviyyəsi ilə ölçüldüyünü bildirib. O, bugünkü karyera festivalına çoxsaylı işəgötürənin qatıldığını və bunun BMU-da verilən ali təhsilin yüksək qiymətləndirilməsinin göstəricisi olduğunu fikirlərinə əlavə edib. Fondun tələbələrin uğurlu karyera qurması və digər istiqamətlərdə həyata keçirdiyi müxtəlif layihələri nəzərə çatdıran Elnur Nəsibov sahibkarlarla ali təhsil müəssisələri arasında əlaqələrin daha da gücləndirilməsinin vacib olduğunu deyib. Tələbə və məzunlara yalnız təhsillə kifayətlənməməyi, daima öz üzərilərində çalışmağı məsləhət görən Fondun sədri karyera festivalında işaxtaranların layiqli iş yeri tapacağına inandığını deyib.
Sonra festivalda Kiçik və Orta Biznes Subyektləri və Klublarının Assosiasiyasının sədri Nigar Ələsgərova, Azərbaycan Korporativ İş Adamları Birliyi İdarə Heyətinin sədri Şirin Şərifov, “Norm ASC”nin insan resursları üzrə koordinatoru Ruslan Osmanlı çıxış ediblər. Çıxışlarda işəgötürənlərlə birbaşa ünsiyyətin qurulmasına əlverişli imkanlar yaradan karyera festivalının rolundan, həmçinin ali təhsil ocaqları ilə sənaye müəssisələri arasında əməkdaşlığın genişləndirilməsinin əhəmiyyətindən danışılıb.
Daha sonra sərgidə nümayiş olunan stendlərə baxış keçirilib.
Digər universitetlərdən 2500-dən artıq məzun və tələbənin qeydiyyatdan keçdiyi, ümumilikdə 5000-ə yaxın iştirakçının qatıldığı karyera festivalı çərçivəsində interaktiv fəaliyyətlər, oyunlar, əyləncəli təcrübələr təşkil olunub, tanınmış müğənnilərin ifasında musiqi nömrələri təqdim edilib.
Bölmənin digər xəbərləri
