“AtaBank” “Baku Shopping Festival” zamanı müştərilərə xidmət göstərəcək
Bakı, 30 aprel, AZƏRTAC
“AtaBank” ASC Azərbaycan paytaxtında keçirilən Ticarət festivalı zamanı əcnəbi qonaqlar və şəhərimizin sakinləri tərəfindən Azərbaycan Respublikasının ərazisində alınmış istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması üzrə müvəkkil bank olaraq müştərilərə xidmət göstərəcək.
Bankdan AZƏRTAC-a bildiriblər ki, ticarət festivalı zamanı 100 manatdan artıq alış-verişə “Tax free” sistemi tətbiq olunacaq ki, bu da ƏDV-ni geri alınmasına şərait yaradacaq.
Məsələn, alıcı “28 Mall” Ticarət Mərkəzində alış-veriş edib və festivalın təqdim etdiyi imkandan yararlanıb ƏDV-ni qaytarmaq istəyir. Bunun üçün uzağa getməyə ehtiyac yoxdur! Dərhal yolu keçib pulunu ala bilər. Harada? “AtaBank”ın baş ofisində.
“AtaBank”ın baş ofisinin ünvanı: Bakı şəhəri, Ş.Bədəlbəyli küçəsi, 102. İş vaxtı saat 09:00-dan 22:00-dək (fasiləsiz).
Şəhərimizin sakinləri və əcnəbi qonaqları “Baku Shopping Festival - Tax Free” nişanı olan bütün mağazalardan alış-veriş edərək əlverişli fürsət qazana biləcəklər.
Bölmənin digər xəbərləri
