AVROPA İTTİFAQI AZƏRBAYCANLA MÜNASİBƏTLƏRİ İNTENSİVLƏŞDİRMƏYƏ ÇALIŞIR
AZƏRTAC xəbər verir ki, Avropa İttifaqının (Aİ) ölkəmizdəki nümayəndəliyinin başçısı Alan Vaddams Azərbaycanla Aİ arasındakı əməkdaşlığın perspektivlərini müzakirə etmək və Azərbaycan şirkətlərinin Avropa bazarlarına çıxması imkanlarını öyrənmək məqsədi ilə iyunun 10-da Xəzər İnteqrasiya İşgüzar Klubunun (CİBC) üzvləri ilə görüşmüşdür. Aİ nümayəndəliyinin başçısı demişdir: “Biz hüquq, iqtisadiyyat, insan hüquqları və sair sahələrdə əməkdaşlığı dərinləşdirmək yolu ilə Azərbaycanla münasibətləri intensivləşdirmək istəyirik”. Onun sözlərinə görə, Avropa İttifaqı Azərbaycan mallarının Aİ bazarlarına çıxarılmasına şərait yaratmağa, Azərbaycanın Dünya Ticarət Təşkilatına qəbul edilməsini dəstəkləməyə hazırdır.
Xəzər İnteqrasiya İşgüzar Klubunun prezidenti Telman Əliyev demişdir ki, qurum Qazaxıstan və Rusiya şirkətlərini öz layihələrinə cəlb etmək yolu ilə fəaliyyətini genişləndirmək niyyətindədir. O vurğulamışdır ki, Təşkilatın fəxri sədri, Azərbaycan Prezidenti İlham Əliyevin təklifi ilə qurumun adı dəyişdirilərək Xəzər Avrointeqrasiya İşgüzar Klubu adlandırılacaqdır.
Sonda Telman Əliyev Alan Vaddamsa klubun fəxri üzvü sertifikatını təqdim etmişdir.
######
Bölmənin digər xəbərləri
