Avstraliya Rusiyadan diplomatlarının çıxarılması barədə qərara təəssüflənir
Tokio, 31 mart, AZƏRTAC
Avstraliyanın Baş naziri Malkolm Ternbull Rusiya Xarici İşlər Nazirliyinin (XİN) cavab tədbirləri çərçivəsində avstraliyalı diplomatların ölkədən çıxarılması barədə qərarına təəssüfləndiyini bildirib.
AZƏRTAC ABC telekanalına istinadla xəbər verir ki, bu fikri Baş nazir məsələ ilə bağlı bəyanatında səsləndirib.
Avstraliya bu ərəfədə Britaniyanın Solsberi şəhərində Serqey Skripalın və onun qızı Yuliyanın zəhərlənməsi ilə əlaqədar iki Rusiya diplomatının ölkədən çıxarılması barədə qərar qəbul etmişdi. Rusiya XİN bəyan edib ki, Moskva rusiyalı diplomatların çıxarılması qərarını qəbul etmiş ölkələrə eyni tərzdə cavab verəcək.
“Bu, təəssüf doğuran, lakin əvvəlcədən gözləniləndir və Avstraliya hökumətinin elan edilməmiş kəşfiyyatçı olan iki rus diplomatın ölkədən çıxarılması barədə qərarına Rusiya hökumətinin cavab reaksiyasıdır”, - deyə Baş nazir bildirib.
M.Ternbullun sözlərinə görə, Avstraliya səfirliyinin əməkdaşları diplomatik və konsulluq münasibətləri barədə Vena Konvensiyasına uyğun olaraq, diplomatik və konsulluq vəzifələrini yerinə yetiriblər və buna görə də Rusiyanın hərəkətinə bəraət qazandırmaq olmaz.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
