AZƏRBAYCAN ALİMLƏRİ BEYNƏLXALQ ATOM ENERJİSİ AGENTLİYİNDƏ MÜZAKİRƏLƏR APARMIŞLAR
Azərbaycan Milli Elmlər Akademiyasının Radiasiya Problemləri İnstitutunun direktoru, AMEA-nın müxbir üzvü Adil Qəribovun rəhbərliyi ilə nümayəndə heyəti Vyanada Beynəlxalq Atom Enerjisi Agentliyində (BAEA) müvafiq layihələr üzrə müzakirələr aparmışdır.
A.Qəribov AZƏRTAC-ın xüsusi müxbiri ilə söhbətində bildirmişdir ki, 2009-2011-ci illərdə Azərbaycan və BAEA arasında texniki əməkdaşlıq çərçivəsində bir sıra layihələr üzərində iş aparılır. Hazırkı səfərin məqsədi həmin layihələrdən ikisi - Azərbaycanda ilk tədqiqat nüvə reaktorunun və sterilləşdirmə qurğusunun inşa edilməsi ilə bağlı müzakirələr aparmaqdır. Nüvə reaktorunun yaradılması ilə ölkənin enerji təminatında yeni bir eraya qədəm qoyulacağını vurğulayan A.Qəribov BAEA-nın müxtəlif strukturlarının məsul şəxsləri və mütəxəssisləri ilə müzakirələrin uğurlu keçdiyini qeyd etmişdir.
Müzakirələr zamanı qərara alınmışdır ki, ilkin olaraq, layihənin texniki-iqtisadi əsaslandırılması, şəraitə uyğun reaktor tipi və inşa ediləcəyi yerin seçilməsi, həmin yerin hidrogeoloji strukturunun və süxurların analizi, ərazidə nüvə təhlükəsizliyi üzrə infrastrukturun yaradılması, qurğuların təhlükəsiz iş rejiminin təmin olunması və nəhayət, reaktorda çalışacaq kadrların hazırlanması məsələlərini nəzərdə tutan iş planları tərtib edilməlidir.
2009-cu ilin yanvarından start veriləcək layihələndirmə prosesi çərçivəsində həmin ilin sonunadək reaktor tipi də müəyyənləşdiriləcəkdir.
Bölmənin digər xəbərləri
