Azərbaycan Boks Federasiyasının vitse-prezidenti AİBA tərəfindən xüsusi mükafatla təltif olunub
Bakı, 17 noyabr, AZƏRTAC
Koreya Respublikasının Jeju şəhərində AİBA-nın növbəti konqresi keçirilib.
Azərbaycan Boks Federasiyasının (ABF) vitse-prezidenti Süleyman Mikayılov idmanın bu növünün inkişafındakı xidmətlərinə görə AİBA tərəfindən xüsusi mükafatla təltif olunub.
ABF-dən AZƏRTAC-a bildiriblər ki, S.Mikayılov növbəti dörd il müddətə AİBA İcraiyyə Komitəsinin üzvü seçilib.
AİBA-nın prezidenti vəzifəsinə isə vahid namizəd olan Çinq Ko Vu seçilib. Artıq üçüncü dəfə olaraq bu vəzifəyə seçilən Çinq Ko Vu növbəti dörd il müddətə beynəlxalq federasiyaya rəhbərlik edəcək.
Konqresdə AİBA-nın yeni vitse-prezidentləri də məlum olub. Afrika qitəsi üzrə Kelani Bayor, Amerikadan Osvaldo Bisbal, Asiyadan Serik Konakbayev, Avropadan Franko Falçinelli, Okeaniyadan isə Ted Tanner vitse-prezident seçiliblər. S.Konakbayev bu postda özbəkistanlı Qafur Rəhimovu əvəzləyib. Q.Rəhimov isə bundan sonra WSB liqası üzrə vitse-prezident kimi fəaliyyət göstərəcək. Timur Kulibayev AİBA “Pro Boxing”, Di Vu isə marketinq üzrə vitse-prezident postunda çalışacaqlar.
Bölmənin digər xəbərləri
