Bakı, 26 fevral, AZƏRTAC

Fevralın 26-da Azərbaycan Dillər Universitetində (ADU) bu ali məktəbin Çin Dili və Mədəniyyəti Mərkəzinin təşkilatçılığı ilə “Çin dili üzrə ixtisas imtahanı - HSK” mövzusunda metodiki seminar keçirilib.

ADU-dan AZƏRTAC-a bildirilib ki, əvvəlcə Xocalı soyqırımı qurbanlarının əziz xatirəsi bir dəqiqəlik sükutla yad edilib.

Seminarda regionşünaslıq və beynəlxalq münasibətlər fakültəsinin dekanı Anar Nağıyev Xocalı soyqırımına siyasi və hüquqi qiymət verilməsinin zəruriliyini qeyd edib.

Tədbirdə “Qarabağ-info” beynəlxalq elektron jurnalının baş redaktoru Zaur Əliyevin bir neçə xarici dildə nəşr olunan “Xocalı soyqırımı beynəlxalq cinayət kimi” kitabı da təqdim edilib.

Çin Dili və Mədəniyyəti Mərkəzinin direktoru, dosent Rafiq Abbasov rəhbərlik etdiyi qurumun Ermənistan-Azərbaycan, Dağlıq Qarabağ münaqişəsi haqqında həqiqətlərin Çin xalqına çatdırılması istiqamətində gördüyü işlər barədə məlumat verib. O, HSK imtahanlarının keçirilməsi xüsusiyyətləri haqqında danışaraq dil bacarıqlarının CEFR Avropa sistemi ilə qiymətləndirilməsi, HSK test metodologiyasındakı oxşarlıqları qeyd edib.

ADU-nun IBT test mərkəzinin direktoru Hökümə Abbasova, ingilis dilinin TOEFL test xüsusiyyətləri, versiyaları və dil səviyyəsinin qiymətləndirilməsi ilə bağlı ətraflı məlumat verib.

Seminar çərçivəsində universitetinin çin dili müəllimləri çinşünaslıq ixtisası üzrə təhsil alan tələbələrə “açıq dərs” keçiblər. Dərsdə tələbələr HSK imtahanlarının əsas və orta səviyyəli məzmunu, dinləmə, oxu, qrammatik strukturları və digər məsələlərlə tanış olublar. Həmçinin “Çin dili” tədris proqramı müzakirə edilib.