Baş məşqçi: Parisdə qızıl medal qazanmaq üçün daim çalışacağıq
Bakı, 3 iyun, AZƏRTAC
“Bu yarış dünya çempionatı səviyyəsində keçdi. Son lisenziya turniri olduğu üçün bir çox ölkələrin ən güclü idmançıları burada öz qüvvəsini sınayırdı. İki boksçumuzun bu sınaqdan üzüağ çıxdığı üçün xoşbəxtik”.
AZƏRTAC xəbər verir ki, bu sözləri kişi boksçulardan ibarət Azərbaycan millisinin baş məşqçisi Pedro Roke Tailandın paytaxtı Banqkokda keçirilən II Dünya Olimpiya Təsnifat Turnirində Paris Olimpiadasına lisenziya qazanmış Azərbaycan boksçularının çıxışı barədə jurnalistlərə açıqlamasında deyib.
Mütəxəssis Parisdə qızıl medal qazanılacağına inandığını bildirib: “Müəyyən rekordlara imza atmışıq. Əldə etdiyimiz 5 lisenziya ilə Avropada birinci, dünyada isə dördüncüyük. Düşünürəm ki, bu, olduqca yaxşı nəticədir”.
O, Azərbaycan Boks Federasiyasının prezidenti Sahil Babayevə, Gənclər və İdman Nazirliyinə təşəkkür edib: “Onlara minnətdaram. Çünki mənə güvəndilər. Hər birinin güvənini doğrultduğum üçün əla hiss edirəm”.
Qeyd edək ki, yığmanın heyətində Nicat Hüseynov (51 kiloqram), Malik Həsənov (63,5 kiloqram), Murad Allahverdiyev (80 kiloqram), Alfonso Dominqes (92 kiloqram) və Məhəmməd Abdullayev (+92 kiloqram) Fransa paytaxtında rinqə çıxacaqlar. Olimpiadada boks yarışları iyulun 27-dən avqustun 10-dək davam edəcək.
Bölmənin digər xəbərləri
