Polşalı musiqiçi: Bakı Caz Festivalında çıxış etmək mənim üçün şərəfdir
Bakı, 9 oktyabr, AZƏRTAC
XXI Bakı Caz Festivalı çərçivəsində “Elektra Events Hall” konsert məkanında festivalın xüsusi qonağı, “Baku Jazz Festival-2026”nın əsas ifaçısı, polşalı bas-gitaraçı Voytek Piliçovski və onun qrupunun konserti böyük uğurla keçib. Qrupun tərkibində Tomaş Madzelevski (zərb alətləri), Filip Xoynatski (klavişlər) və Lukaş Rudkeviç (gitara) yer alıblar.
AZƏRTAC xəbər verir ki, Voytek Piliçovski Polşanın ən tanınmış bas-gitaraçılarından, bəstəkarlarından və musiqi prodüserlərindən biridir. O, karyerası ərzində 200-dən çox albomun yazılmasında iştirak edib və müxtəlif musiqi janrlarını təmsil edən aparıcı ifaçılarla birlikdə işləyib. Solo ifaçı kimi 20 albom buraxıb.
Onun ifa tərzi virtuoz texnikası, güclü ritmik axını və səhnədə nümayiş etdirdiyi qeyri-adi enerjisi ilə seçilir. Voytek Piliçovski uzun illərdir dünyanın müxtəlif ölkələrində ustad dərsləri də keçir və bununla bas-gitaraçıların yeni nəslini ruhlandırır.
AZƏRTAC-ın müxbiri ilə söhbətində o, Bakı Caz Festivalının iştirakçısı olmaqdan böyük məmnunluq duyduğunu bildirib.
“Bu gün bu səhnədə çıxış etmək mənim üçün böyük şərəfdir. Üstəlik, Azərbaycana ilk dəfədir gəlirəm. Bu səbəbdən festival mənim üçün xüsusilə həyəcanvericidir”, – deyə musiqiçi vurğulayıb.
Azərbaycan cazının səslənməsindən danışan polşalı qonaq Bakı Caz Festivalının təsisçisi, tanınmış saksofonçu Rain Sultanovun yaradıcılığını xüsusi qeyd edib: “Rain heyrətamiz musiqiçidir. Onun musiqisini çox sevirəm”.
XXI Bakı Caz Festivalı oktyabrın 3-dən 11-dək Bakı şəhərində, eləcə də paytaxtdan kənarda keçirilir. Bu il festivalda 10-dan çox ölkədən sənətçilər iştirak edirlər. Caz həvəskarlarını rəngarəng konsertlər, film nümayişi və cem-seyşnlar gözləyir. Festivalın son iki günü açıq havada – İçərişəhərdə, “Qız qalası”nın yaxınlığında keçiriləcək. Açıq havada keçiriləcək konsertlərə giriş sərbəstdir.
Müəllif – Anara Axundova
Bölmənin digər xəbərləri
