Azərbaycan Əlil Təşkilatları İttifaqının nümayəndələri Berlində keçirilən konfransda iştirak ediblər
Bakı, 30 mart, AZƏRTAC
Berlində Almaniya Əlil Təşkilatları Birliyinin təşkilatçılığı, Almaniya Xarici İşlər Nazirliyinin dəstəyi ilə “Əlilliyi olan şəxslərin mədəniyyət, turizm və idman sahəsində tam iştirakı - maneəsiz həyat” mövzusunda beynəlxalq konfrans keçirilib.
AZƏRTAC xəbər verir ki, konfransda Beynəlxalq Əlil Təşkilatları Birliyinin üzvləri, yerli və beynəlxalq təşkilatların nümayəndələri, Almaniya Bundestaqının üzvləri iştirak ediblər.
Konfransda Beynəlxalq Əlil Təşkilatları Birliyi idarə heyətinin üzvü olan Azərbaycan Əlil Təşkilatları İttifaqına daxil olan təşkilatları təmsil edən dörd nəfərdən ibarət nümayəndə heyəti iştirak edib.
Azərbaycan Əlil Təşkilatları İttifaqının prezidenti , Beynəlxalq Əlil Təşkilatları İttifaqının vitse-prezidenti və idarə heyətinin üzvü Davud Rəhimli təqdimatla çıxış edib. Konfrans iştirakçılarına BMT-nin “Əlilliyi olan şəxslərin hüquqları haqqında” Konvensiyasının yerinə yetirilmə vəziyyəti barədə çap materialları paylanılıb və Azərbaycan ərazilərinin 20 faizinin Ermənistan tərəfindən işğal olunması həmin materiallarda öz əksini tapıb.
Növbəti konfransın Bakıda keçirilməsi qərara alınıb.
Bölmənin digər xəbərləri
