Azərbaycan gəncləri yeni yaradılmış Beynəlxalq Gənclər Təşkilatının üzvü seçilmişlər
Bakı, 23 iyul (AZƏRTAC). Rusiya Federasiyasında Müstəqil Dövlətlər Birliyinin gənclər gününə həsr olunmuş gənclər düşərgəsi çərçivəsində “Birlik” Beynəlxalq Gənclər Təşkilatının təsis edilməsi ilə bağlı yığıncaq keçirilmişdir.
Yığıncaqda MDB-yə daxil olan 10 ölkənin gəncləri Beynəlxalq Gənclər Təşkilatının yaranmasına təşəbbüs göstərmişlər. Azərbaycan Respublikası Gənclər Təşkilatları Milli Şurasının (ARGTMŞ) rəhbəri Şahin Seyidzadə və “İrəli” İctimai Birliyinin nəzarət - təftiş komissiyasının rəhbəri Xaqani Fərəcov yeni yaranmış təşkilatın idarə heyətinin, ARGTMŞ-nin sədr müavini Ramiz Əliyev isə təşkilatın nəzarət - təftiş komissiyasının üzvü seçilmişlər.
ARGTMŞ-nin rəhbəri Şahin Seyidzadə AZƏRTAC-a bildirmişdir ki, yeni yaradılmış təşkilat müxtəlif ölkələrin gənc liderləri arasında təcrübə mübadiləsinə imkan yaradacaqdır. Şübhəsiz, Azərbaycan nümayəndələri təşkilata üzv seçilməklə ölkəmizi beynəlxalq səviyyədə daha yaxşı təmsil edə biləcəklər.
Beynəlxalq gənclər düşərgəsi iyulun 26-dək davam edəcəkdir.
Bölmənin digər xəbərləri
