AZƏRBAYCAN RESPUBLİKASININ PREZİDENTİ YANINDA ELMİN İNKİŞAFI FONDUNUN FƏALİYYƏTİ ÇOXŞAXƏLİ OLACAQDIR
Bakı, 31 mart (AZƏRTAC). Fevralın 19-da nizamnaməsi təsdiq olunan, martın 15-də isə rəsmi dövlət qeydiyyatından keçən Azərbaycan Respublikasının Prezidenti yanında Elmin İnkişafı Fondu elmin inkişafı sahəsində daha çevik qurum kimi fəaliyyət göstərəcəkdir.
Fondun icraçı direktoru Elçin Babayev bildirmişdir ki, qurumun əsas məqsədi elmi tədqiqatlara tələb olunan fərdi yanaşmaları araşdırmaq, bu tədqiqatların aparılmasının yeni üsullarla maliyyələşdirilməsini həyata keçirməkdir. Bura yalnız fundamental elmi tədqiqatlar deyil, həmçinin tədqiqi innovasiya xarakterli işlərin maliyyələşdirilməsi də aiddir. Maliyyələşdirmə həm qrantlar, həm də xüsusi proqramlar vasitəsilə həyata keçiriləcəkdir. E.Babayev demişdir ki, biz mayın ortalarından qrantlar üçün müsabiqə elan etməyə hazırlaşırıq.
Ümumiyyətlə, həyata keçiriləcək planların spektri çox genişdir. Əhəmiyyətli konfranslar, seminarlar, beynəlxalq və regional xarakterli tədbirlər, habelə, gənclərə dəstək, ümumiyyətlə ölkə üçün əhəmiyyətli məsələlərin həllinə kömək göstərmək xüsusi proqramlar vasitəsilə həyata keçiriləcəkdir.
Bölmənin digər xəbərləri
