AZƏRBAYCAN RƏSSAMI ROMA PAPASI II İOANN PAVELİN PORTRETİNİ ÇƏKMİŞDİR
Ötən il Florensiya şəhərində əsərləri İtaliya rəssamlarının tabloları ilə birlikdə nümayiş etdirilən Azərbaycan rəssamı Sakit Məmmədov Roma Papası II İoann Pavelin portretini çəkmək barədə təklif almışdı.
Sifarişi artıq yerinə yetirmiş rəssam AZƏRTAC-ın müxbiri ilə söhbətində demişdir ki, İtaliyanın ölkəmizdəki səfiri xanım Marqarita Kosta və Vatikanın Cənubi Qafqaz ölkələri üzrə səfiri Klaudio Qucerotti onunla görüşmüş, portretin məharətlə yaradılmasından razı qaldıqlarını bildirmişlər. Səfirlər Papanın da əsəri bəyənəcəyinə əmin olduqlarını vurgulamışlar.
Səfir K.Qucerotti rəssamdan özü haqqında məlumatları onlara göndərməyi də xahiş etmişdir. Çünki həmyerlimiz portreti Papaya təqdim etmək üçün fevral ayında Vatikana gedəcəkdir.
Bölmənin digər xəbərləri
