MƏDƏNİYYƏT
Azərbaycan Ümumdünya Parfümeriya Konqresində təmsil olunub VİDEO
![Azərbaycan Ümumdünya Parfümeriya Konqresində təmsil olunub VİDEO](/files/2024/2/1200x630/1719632071191863401_1200x630.jpg)
Cenevrə, 28 iyun, AZƏRTAC
Dünyanın qabaqcıl ətir sənayelərinin nümayəndələri Cenevrədə Ümumdünya Parfümeriya Konqresində bir araya gəliblər. Ətriyyatçılar ətir sənayesində innovasiyaya təkan verən əsas amilləri, xüsusilə də bütün seqmentlər üzrə qlobal tendensiyaları, yeni tənzimləmə və süni intellektə diqqət yetirməklə ən qabaqcıl texnoloji innovasiyaların sənayeyə və ətriyyatçıların yaradıcılığına necə təsir göstərdiyini müzakirə ediblər. Konqres çərçivəsində ətir sənayesi üçün xammal və xidmətlərə həsr edilən peşəkar beynəlxalq sərgi də təşkil olunub.
AZƏRTAC xəbər verir ki, Ümumdünya Parfümeriya Konqresində və sərgidə ölkəmizi Azərbaycanın ətir sənayesi sahəsində ixtisaslaşmış “Lecheq Farm & Distillery” şirkəti yüksək səviyyədə təmsil edir.
“Lecheq Farm & Distillery” şirkəti isə icraçı direktor Bəxtiyar Heraçiyev və kommersiya direktoru Nicat Mahmudlu ilə təmsil olunur. Şirkətin stendində təbii məhsullardan hazırlanmış müxtəlif çeşidli bitki yağları, kosmetika və aromaterapiya üzrə məhsullar nümayiş etdirilir.
Azərbaycanın əsrarəngiz guşəsində - Zaqatalada və Şəkidə becərilmiş qızılgül, lavanda, yovşan və digər çöl çiçəklərindən hazırlanmış aroma yağlar ətir istehsalçılarının diqqətini cəlb edib. Sərgini ziyarət edən məşhur ətriyyat markalarının aparıcı ətriyyatçıları, ətriyyat ekspertləri Azərbaycan qızılgül yağını çox yüksək qiymətləndiriblər. Onlar Zaqatalada istehsal edilən qızılgül yağının qeyri-adi ətir nüansına malik olduğunu, digər ölkələrdən gələn qızılgül yağlarının ətrindən tamamilə fərqləndiyini xüsusi vurğulayıblar. Azərbaycandan gələn bitki yağlarının belə təkrarolunmaz ətrə malik olmasını ölkənin iqlimi və torpağı ilə əlaqələndiriblər.
Dünyada ən məşhur ətirlərin əsas komponenti olan Zaqatala Dəməşq qızılgülünün ləçəklərindən alınan qızılgül yağı və suyu zəngin və valehedici aromalarına görə yüksək qiymətləndirilir. Bu qızılgülün bal, sitrus notları ehtiva edən yağı mürəkkəb qoxu profili ilə ən çox sevilən yüksək markalı ətirlərə dərinlik və zəriflik əlavə edir. Eyni zamanda, qızılgül yağı nəmləndirici və iltihab əleyhinə xüsusiyyətlərinə görə dəriyə qulluq məhsullarında da istifadə olunur. Təravətləndirici və sakitləşdirici xüsusiyyətləri ilə tanınan qızılgül suyu tonusverici və üz təmizləyicilərində geniş istifadə edilir. Həmçinin müxtəlif fərdi qulluq məhsullarına, losyonlara və şampunlara təbii ətir kimi əlavə olunur.
Dəriyə qulluq və parfümeriyada geniş istifadəsindən əlavə qızılgül suyu bir sıra digər seqmentlərdə istifadə olunmamış potensiala malikdir. Kulinariya dünyasında, desertlərə, içkilərə və hətta ləzzətli yeməklərə incə çiçək notu əlavə etmək üçün istifadə oluna bilər, incə aroması ilə duyğusal təcrübəni artırır. Sağlamlıq və aromaterapiyada qızılgül suyu sakitləşdirici və stresi azaldan faydalarına görə otaq spreyləri, vanna duzları və meditasiya vasitələri kimi məhsullara daxil edilə bilər. Əczaçılıq sənayesində onun iltihab əleyhinə və antibakterial xüsusiyyətlərini təbii vasitələrdə və dərman preparatlarında istifadə üçün əvəzsiz məhsuldur.
Dünyada qabaqcıl ətir brendlərinin ətriyyatçıları Azərbaycan stendini ziyarət edərək ölkəmizin ətriyyat yağları ilə tanış olub, onların xüsusi notlara malik olduğunu vurğulayıblar.
Müxtəlif ölkələrin ətriyyat üzrə ixtisaslaşmış təhsil ocaqlarının yüksək səviyyəli nümayəndələri, ekspertləri Azərbaycandan gələn bitki yağları ilə maraqlanaraq əməkdaşlıq təklif ediblər. Onlar “Lecheq Farm and Distillery”nin nümayiş olunan bitki yağlarının çalarlarından söz açaraq onların hər birini yüksək qiymətləndiriblər. Onların ətir nüanslarını və notlarını xüsusi qeyd ediblər. İqlim və torpağın belə müxtəlif nüanslı ətirli yağlar verən bitkilərə təsirindən danışıblar. Ziyarətçilər Azərbaycan şirkəti ilə əməkdaşlıqda maraqlarını ifadə edib, şirkətə səfər etmək üçün ölkəmizə gəlmək istədiklərini bildiriblər.
“Lecheq Farm and Distillery” şirkətinin nümayiş etdirdiyi 53 illik qızılgül yağı bütün mütəxəssislər tərəfindən yüksək qiymətləndirilib.
Şirkət digər xammal tədarükçüləri arasında davamlılığa və ictimaiyyətin iştirakı ilə bağlı sarsılmaz öhdəliyinə görə seçilir. Sahələri üzvi şəkildə becərilir və efir yağlarının zərərli kimyəvi maddələrdən, pestisidlərdən azad olmasını təmin edir. Təbii ekosistemi qoruyan və biomüxtəlifliyi təşviq edən davamlı əkinçilik üsullarına üstünlük verir. Şirkət elə əkin sahəsində yerləşən zavodu səmərəliliyi artırmaq və tullantıları minimuma endirmək üçün qabaqcıl texnologiyadan istifadə edir. Şirkət yerli icmanın rifahı ilə maraqlanır, məhsul mövsümünün qızğın vaxtında təxminən 1800 işçiyə iş imkanları təqdim edir və bununla da yerli iqtisadiyyatı əhəmiyyətli dərəcədə dəstəkləyir. “Lecheq Farm & Distillery” şirkətinin təşəbbüslərinə təhsil proqramları, səhiyyə və ətraf kəndlərdə infrastrukturun inkişafına töhfə verməkdə daxildir. Şirkət məhsul çeşidlərini ildən-ilə daha da zənginləşdirir. “Lecheq Farm and Distillery” beynəlxalq sərgilərdə və konqreslərdə iştirakı ilə istehsal gücünü artırır, qlobal miqyasda yeni bazarlar fəth edir.
Bir neçə ildir ki, Parisdə Avropanın ətriyyat sənayesi üzrə ən qədim və ən böyük peşəkar sərgisi – SİMPPAR-da iştirak edən “Lecheq Farm & Distillery” cari ilin mayında Fransanın dünyada çiçəklər və ətirlər paytaxtı kimi tanınan Qras (Grasse) şəhərində beynəlxalq sərgidə də xammal məhsullarını uğurla nümayiş edib.
Xatırladaq ki, “Lecheq Farm & Distillery” hələ 1950-ci illərdən mükəmməl iqliminə görə qızılgül becərilməsi mədəni irsinin tərkib hissəsi olan Zaqatalada bu irsi yenidən canlandırıb. 1990-cı ildə SSRİ-nin dağılması ilə fəaliyyətinə son qoymuş bu qızılgül sənayesi 2016-cı ildə yenidən “Lecheq Farm & Distillery” adı ilə fəaliyyətini bərpa edib və qısa müddətdə beynəlxalq səviyyədə layiqli yerini tutub.