Azərbaycan və İordaniya arasında əməkdaşlıq sürətlə inkişaf edir
Bakı, 14 mart, AZƏRTAC
Azərbaycan Respublikası və İordaniya Haşimilər Krallığı arasında əməkdaşlıq sürətlə inkişaf edir. Hər iki dövlət diplomatik münasibətlərin qurulduğu 30 il ərzində əlaqələrin möhkəmləndirilməsi istiqamətində mühüm addımlar atıb.
Ölkəmizin İordaniyadakı səfirliyindən AZƏRTAC-a bildiriblər ki, bu fikirlər Krallığın təşəbbüsü ilə İordaniyanın keçmiş daxili işlər naziri Samir əl-Habaşnehin rəhbərlik etdiyi İordaniya Elm və Mədəniyyət Assosiasiyasında Azərbaycan və İordaniya arasında diplomatik əlaqələrin qurulmasının 30-cu ildönümünə həsr olunmuş tədbirdəki çıxışlarda vurğulanıb.
Krallığın sabiq və hazırkı parlament üzvlərinin, tanınmış siyasi və elm xadimlərinin, Əmmanda akkreditə olunmuş bir sıra xarici diplomatik missiya rəhbəri və diplomatlarının, eləcə də KİV nümayəndələrinin iştirakı ilə keçirilən tədbiri açan S.Əl-Habaşneh qardaş ölkələrimizin rəhbərləri arasında dostluq əlaqələrinin yüksək səviyyəsini xüsusi qeyd edib, paytaxt Əmman və Bakıda fəaliyyət göstərən səfirliklərin ikitərəfli əlaqələrin inkişafındakı mühüm rolunu vurğulayıb. O, Bakıya səfərləri və keçirdiyi məhsuldar görüşlərdən də bəhs edib, İordaniya-Azərbaycan əlaqələrinin mövcud potensialından istifadə edilməsinin zəruriliyi diqqətə çatdırıb.
Səfir Eldar Səlimov çıxışında Azərbaycanın XX əsrdə dövlətçilik tarixindən, eləcə də postsovet dövründən geniş bəhs edib. O diqqətə çatdırıb ki, 1991-ci il dekabrın 28-də İordaniya ölkəmizin dövlət müstəqilliyini tanıyan ilk ölkələr sırasında olub. Səfir ölkələrimiz arasında əlaqələrin 30 illik tarixi barəsində dolğun danışıb. O bildirib ki, 1994-cü ildə İƏT-in Kasablanka Zirvə görüşü çərçivəsində Azərbaycan xalqının Ümummilli Lideri Heydər Əliyev və Kral Əl-Hüseyn bin Talal arasında baş tutmuş tarixi görüş iki ölkə arasında dostluq və əməkdaşlıq əlaqələrinin əsasını qoyub, bu əlaqələr Azərbaycan Prezidenti İlham Əliyev və İordaniya Kralı II Abdullah tərəfindən keyfiyyətcə və məzmunca yeni mərhələyə yüksəlib.
Səfir E.Səlimov dost İordaniyanın artıq tarixə qovuşmuş Qarabağ münaqişəsində tutduğu ədalətli mövqeyinin Azərbaycan dövləti və xalqı tərəfindən yüksək qiymətləndirildiyini bildirərək, bu gün erməni işğalından azad edilmiş tarixi torpaqlarımızda həyata keçirilən layihələr haqqında qonaqları məlumatlandırıb, iordaniyalı iş adamlarını Qarabağ və Şərqi Zəngəzur iqtisadi zonalarına sərmayə yatırmağa dəvət edib. O əlavə edib ki, artıq ilk məcburi köçkün ailələri öz dədə-baba yurdlarına qayıdıb və qayıdış prosesi davam edir.
Sonra səfir E.Səlimov Azərbaycan və İordaniyanın müxtəlif sahələrdə, o cümlədən turizm sektorunda malik olduqları əməkdaşlıq imkanlarına toxunaraq, bu istiqamətdə mövcud geniş potensialdan istifadə edilməsinin vacibliyini vurğulayıb.
Diplomatımız müstəqillik dövründə ölkəmizdə turizm sahəsində yaradılmış geniş imkanlar üzərində ətraflı dayanıb, Azərbaycana gələn qonaqların xalqımızın mədəniyyəti - teatr, kino, musiqi, xalçaçılıq nümunələri ilə tanış olduqlarını diqqətə çatdırıb. O, mədəniyyətimiz və incəsənətimiz barəsində müfəssəl məlumat verib, həmçinin vurğulayıb ki, Azərbaycan muğamı 2003-cü ildə UNESCO tərəfindən bəşəriyyətin şifahi və qeyri-maddi irsinin şah əsərlərindən biri elan olunub. 2010-cu ildən etibarən Azərbaycan xalçaları UNESCO-nun "Qeyri-maddi Mədəni İrs" siyahısında qorunur.
Sonda səfir E.Səlimov Azərbaycan və İordaniya arasında bütün sahələrdə mövcud imkanlardan istifadə olunacağına ümidvar olduğunu bildirib, bu istiqamətdə iordaniyalı həmkarlar və dostlarla birgə işləməyə hazır olduğunu diqqətə çatdırıb.
Tədbirdə çıxış edən tarixçi, yazıçı-publisist Ömər əl-Armuti 2017-ci ildə işıq üzü görmüş “İordaniya-Azərbaycan əlaqələri” adlı kitabında bəhs etdiyi əsas məqamlar, həmçinin yüksək səviyyəli görüş və səfər mübadilələri haqqında məlumat verib.
Tədbir Azərbaycan və İordaniya arasında qarşılıqlı əməkdaşlığın inkişafı məsələləri ətrafında fikir mübadiləsi ilə davam edib.
Bölmənin digər xəbərləri
