Azərbaycanda fiberoptik internet şəbəkəsi genişləndirilir
Tbilisi, 14 sentyabr, AZƏRTAC
Azərbaycanda fiberoptik internet şəbəkəsi genişləndirilir. 2024-cü ilin sonunadək Azərbaycanda 100 faiz optik internet şəbəkəsi qurulacaq.
AZƏRTAC xəbər verir ki, bu barədə jurnalistlərə Tbilisidə keçirilən “Beynəlxalq Rəqəmsal Əlaqə Sammiti - 2022”də iştirak edən rəqəmsal inkişaf və nəqliyyat nazirinin müavini Samir Məmmədov məlumat verib. Bildirib ki, cari ilin sonunadək çəkiləcək fiberoptik internet şəbəkəsi 800 min nəfəri yüksək sürətli internetlə təmin edəcək.
Nazir müavini deyib: "Azərbaycanda fiberoptik internet şəbəkəsi genişləndirilir. Biz son bir il ərzində Aztelekom, Baktelekom vasitəsilə fiberoptik şəbəkənin genişləndirilməsinə başlamışıq. Bu günə artıq 600 min əhalinin yaşadığı ərazidə optik internetin verilməsi imkanları mövcuddur. İlin sonuna bu rəqəm 800 minə çatdırılacaq və 2024-cü ilin sonunadək Azərbaycanda 100 faiz yüksəksürətli optik internet şəbəkəsi qurulacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
